Siglir tar il cuntegn
cuntegn

Pyeongchang 2018 Tgi ha la pli greva bagascha?

La Norvegia: Grazia a la victoria da Björgen la dumengia dumbra il pajais 39 medaglias. Sin plazza dus e trais suondan la Germania ed il Canada.

Rintgs olimpics.
Legenda: Ils gieus olimpics a Pyeongchang van a fin la dumengia. Keystone

Grazia a la victoria da Marit Björgen sin ils 30 kilometers po la Norvegia stuschar la Germania da l'emprim plaz tar il spievel da medaglias. Il pajais scandinav ha rimnà 39 medaglias tar ils gieus olimpics a Pyeongchang – 14 da quellas èn medaglias d'aur, 14 èn d'argient ed 11 da bronz. Quai è in record: Anc mai ha ina naziuns pudì rimnar tantas medaglias tar ils gieus d'enviern.

Er la Germania ed il Canada èn stads diligents. Ils Germans han tar las 102 decisiuns fatg 14 giadas aur, 10 giadas argient e set giadas bronz. Ed il Canada ha gudagnà 29 medaglias.

Per la Svizra van ils gieus a fin cun 15 medaglias

Ils atlets svizzers han pudì rimnar 15 medaglias – vul dir 5 dad aur, 6 dad argient e 4 da bronz – ed è uschia sin plaz otg tar il dumber da medaglias. Tiers las medaglias vegnan anc 16 diploms. Resultats che cuntentan. Il sport d'enviern svizzer haja sa mussà da la meglra vart, ha ditg il «chef de mission» Ralph Stöckli envers SRF.

Il skiunz Ramon Zenhäusern vegn a purtar la bandiera svizra e manar la delegaziun svizra en il stadion a la ceremonia finala dals 23avels gieus olimpics d’enviern.

RR novitads 11:00