Als gieus olimpics a Tokio na po Giulia Steingruber betg cumbatter per medaglias en la disciplina siglir, sia disciplina da parada. Atgnamain ha Steingruber mussà dus buns sigls cun in total da 14, 566 puncts. Tuttina n'ha quai betg tanschì per il final. Ella vegn novavla e manchenta il final da las meglras otg be per 0,05 puncts. Als gieus olimpics da Rio il 2016 aveva la gimnasta artistica da 27 onns fatg bronz en questa disciplina.
Final en la concurrenza multidisciplinara
Er sin la barra assimetrica, la gimnastica per terra e sin la trav d'equiliber na Steingruber betg pudì suenter a las meglras. Sco pitschen cunfort po ella però sa participar al final da la concurrenza multidisciplinara ils 29 da fanadaur. Sco 23avla ha ella gist anc cuntanschì quest final da las meglras 24.