Siglir tar il cuntegn

Header

cuntegn

Golia dal Cdh Engiadina Vanessa Bolinger nominada per l’equipa naziunala

Premiera per la golia dal Cdh Engiadina Vanessa Bolinger. Per l’emprima giada è ella vegnida nominada per l’equipa naziunala da las dunnas. Ella è part dal cader naziunala che po ir al campiunadi mundial en Canada.

Gronda onur perla golia dal Cdh Engiadina Vanessa Bolinger. Per l’emprima giada en sia carriera è la golia da la squadra da l’Engiadina Bassa nominada per l’equipa naziunala. Vanessa Bolinger è ina da trais golias ch'il trenader da la naziunala da las dunnas, Colin Muller, ha nominà per il proxim campiunadi mundial en il Canada.

Bolinger ha cumenzà cun sia carriera a Seewen en il chantun Sviz. Là ha ella era fatg il pass en la naziunala sut 18 onns. E pli tard era en liga naziunala A tar l’equipa da las dunnas dal SC Reinach. Là n'ha ella dentant betg savì mussar sia classa. Feridas han adina puspè franà la giuvna da la svizra Centrala. Suenter in viadi dal mund ha ella survegnì a Scuol ina segunda schanza sco emprim goli feminin tar l’equipa dals umens dal Cdh Engiadina. Durant la stagiun passada ch'è vegnida interrutta pervia dal virus da corona ha ella dà tschintg partidas en il dress dal Cdh Engiadina, ed uss la nominaziun sco ina da las trais golias da l’equipa naziunala.

Vanessa Bolinger cun premiera, Evelina Raselli gia per l'otgavla

Sper Vanessa Bolinger ha il trenader da l’equipa naziunala er anc nominà Evelina Raselli da Poschiavo en il cader da la naziunala. Raselli ha gronda experientscha. Ella era gia l’onn 2014 part da l’equipa da bronz tar ils Gieus Olimpics da Sotschi. Per ella è il campiunadi mundial en il Canada gia l'otgavel da la carriera. Il campiunadi mundial da hockey da las dunnas ha lieu dals 6 fin ils 16 da matg en il Canada a Halifax e Truro.

audio
Per tadlar: las novitads da las 12:00
ord RTR Audio dals 08.04.2021.
laschar ir. Durada: 5 minutas 38 Secundas.

RTR novitads 12:00

Artitgels legids il pli savens