Il Grischun è losch dad Armon Orlik – spezialmain las abitantas ed ils abitants da ses vitg nativ. Nus essans stads a sentir il puls en il vitg nativ dal nov retg.
Gronda festa per il retg a Maiavilla
Il nov retg da lutga, Armon Orlik, e vegnì beneventà e festivà freneticamain en sia patria a Maiavilla. En strusch trais dis han ils da Maiavilla organisà ina festa ch‘ha cumenzá cun in til da la staziun fin en il center istoric dal vitg. Al til han ils visitadras e las visitaders era vesì il muni Zibu. Suenter il til hai dà divers pleds, tranter auter dal president da la regenza Marcus Caduff e dal treidubel retg da lutga Jörg Abderhalden. Sa preschentà sin la tribuna èn dasper il retg cunzunt era ses collegas dal NOS ch‘han gudagnà in cranz federal a Mollis, uschia tranter auter Samuel Giger, Werner Schlegel, Damian Ott u Domenic Schneider.
Er preschent è sa chapescha stà il frar Curdin Orlik. Er el che cumbatta per la Federaziun bernaisa è vegnì festivà. Curdin Orlik ha medemamain gudagnà in cranz federal. L‘entir act festiv ch’è vegnì embellì cun divers acts musicals, tranter auter da la societad da musica da Maivilla, ha cuzzà bun duas uras. Silsuenter è vegnì fatg festa cun l‘emprim retg da lutga grischun. La festa a Maiavilla ha carmalà millis e millis da fans. Las streglias e vias da Maiavilla fullandas cun glieud, ina festa istorica
-
Bild 1 von 7. Curdin Orlik, ch'ha sez gudagnà in cranz a la festa federala da lutga a Mollis, è sa chapescha er a Maiavilla per celebrar ses frar Armon. Bildquelle: RTR.
-
Bild 2 von 7. Robin Städler, il trenader ch'ha gidà ils ultims dus onns adArmon Orlik da cuntanscher sia prestaziun maximala. El sa legria gia sin las festivitads. Bildquelle: RTR.
-
Bild 3 von 7. I n'è betg da survesair quant losch ch'il vitg nativ d'Armon Orlik, Maiavilla, è da ses nov retg da lutga. Bildquelle: RTR.
-
Bild 4 von 7. Era Paul Orlik è natiralmain plain luschezza per ses figl Armon Orlik. Bildquelle: RTR.
-
Bild 5 von 7. Fluras, sitgas e resgim – il vitg Maiavilla ha creà cun premura in'atmosfera festiva per la festa gronda. Bildquelle: RTR.
-
Bild 6 von 7. Bildquelle: RTR.
-
Bild 7 von 7. Era la tribuna per la gronda festa è pronta. Bildquelle: RTR.
Armon Orlik survegn ina plazza a Maiavilla
La citad nativa dad Armon Orlik vul numnar ina plazza tenor ses retg da lutga. Quai ha il president da la citad, Heinz Dürler ditg durant l’act festiv. Maiavilla veglia regalar ad el insatge ch’i na dettia betg en in pavigliun da premis da festas da lutga.
En onur dad Orlik duai ina plazza vegnir renumnada. Er per quest event duai dar ina pitschna festa.
L'um davos il retg da lutga
In grond merit vi dal success d'Armon Orlik ha er ses trenader atletic, Robin Städler, oriund da Zernez. El ha accumpagnà ed encuraschà il nov retg da lutga ils ultims trais onns per ch'el possia cuntanscher sia prestaziun maximala.
A Mollis è il grond siemi finalmain ì en vigur per il lutgader da Maivilla. Robin Städler, raquinta avant la gronda festa a Maiavilla dal viadi cun Armon Orlik fin il grond titel d'emprim retg grischun:
Co tut ha cumenzà per Armon Orlik
Cun 30 onns dastga Armon Orlik uss sa numnar l'emprim retg da lutga grischun. Uschia ha el encuranà sia carriera da lutga ch'ha gia cumenzà baud, er inspirà da la passiun dal bab Paul Orlik ch'era sez lutgader. Questa passiun da la famiglia Orlik ha purtà fritg – tant Armon, sco era ses frar Curdin Orlik tutgan oz tar l'elita da la lutga.
Gia cun 21 onns ha Armon Orlik cuntanschì la lutga finala a Estavayer-le-Lac. Dapi lura ha el cuntinuà sia via cun success ed adina cun il grond siemi en egl ch'è uss finalmain ì en vigur: daventar il retg.
Maiavilla è plain luschezza
Ins senta: Quels e quellas da Maiavilla èn superbis da lur retg da lutga. E perquai era er il program da la fin d'emna passada cler per blers: Guardar l'ESAF. Tuttina, sche a Mollis tar in public viewing, u classic a chasa sin il canapè.
In e l'autra ha schon fatg la dumengia in viva sin il nov retg da lutga, la gronda festa è dentant stada la mesemna, ils 3 da settember. La saira a las 18:00 hai cumenzà cun la retschavida dad Armon Orlik a la staziun da Maiavilla. Il cortegi ha manà el, ses muni e blera glieud en il center dal vitg, nua che la festa principala ha gì lieu.
E per Maiavilla n'èsi betg l'emprima festa da far per Armon Orlik: