Il Club da hockey da Tavau è ì cun la confidenza da duas victorias encunter Berna e Rapperswil en il duel cunter Bienna. E questa confidenza han ins vis sin il glatsch. En l’emprim terz ha Bienna anc empruvà da surprender suramaun dal gieu. Suenter in pèr minutas è Tavau però arrivà en la partida ed a partir da quel mument è stà cler tgi ch'è il patrun-chasa. Cun blera disciplina, dentant er cun blera pazienza ha il HCD giugà ora Bienna. Gist en il terz d’amez nua che Tavau ha pudì marcar in culp dubel aifer da be 70 secundas è la partida stada decisa. Bienna n'è a partir da quel mument betg pli vegnì da storscher il gieu. Il cuntrari è stà il cas. Il HCD ha anc augmentà sin 3:0. Grazia a la victoria encunter Bienna è il HCD puspè tranter las meglras sis equipas dal campiunadi.
Bienna vegn adina meglier
Gia ditg spetgan ins a Bienna sin il proxim titel. Il davos titel da campiun è gia 40 onns enavos. Dapi che l’equipa dal trenader Antti Törmänen ha survegnì avant sis onns ina nova halla da glatsch vegn la squadra adina pli ferma. Questa stagiun, cun nov sis giugaders esters en il cader, è Bienna fitg ferm. Malgrà quai è il HCD stà bun da batter l’equipa bernaisa.
Ils ulteriurs resultats:
- Ajoie – Kloten 1:2 suenter prolungaziun
- Ambri – Losanna 2:3
- Friburg-Gottéron – ZSC Lions 0:2
- Genevra – Lakers 2:3 suenter prolungaziun
- SCL Tigers – Berna 4:2
- Zug – Lugano 1:4