Da la bell'entschatta da la qualificaziun ha il HCD dominà la concurrenza. La fin dals quints han ils Grischuns distanzià la concurrenza per 17 e dapli puncts. 36 da 52 gieus da qualificaziun han els gudagnà. Las schanzas sin l'emprim titel da campiun svizzer dapi il 2015 èn pia uschè bunas sco daditg betg pli. Ma mintgin ch'enconuscha il sport da hockey sa ch'ils playoffs èn tut insatge auter che la qualificaziun.
«Cler che nus vulain il titel»
In giugader rumantsch da Madulain, che vul finalmain ir per il titel da champiun svizzer è Davyd Barandun. Il defensur dal HCD che banduna il Club da hockey da Tavau suenter questa stagiun. Suenter 12 onns va el en direcziun Berna. Pudair bandunar il HCD cun in titel fiss in siemi, di el.
Davyd Barandun (26) è dapi il 2014 part dal Club da hockey da Tavau. Suenter emprims onns tar ils juniors è el uss gia dapi 9 onns giugader da l'emprima equipa dal HCD. Sco defensur cun las grondas fermezzas sin la lavur defensiva ha el fatg in num ils ultims onns. E spezialmain questa stagiun ha el, tenor opiniun d'experts, anc ina giada fatg in proxim pass enavant en ses svilup. Quai mussan er las cifras: En 47 gieus ha el rimnà 13 puncts da scorer e plinavant ha el gì durant la qualificaziun ina bilantscha da +29. Quai vul dir ch’el era bler pli savens sin il glatsch tar gols da sia squadra che tar cuntergols.
Mo il topscorer Matej Stransky ha gì ina meglra bilantscha da plus/minus tar il HCD. Er il topscorer Stransky banduna la fin da la stagiun il HCD e turna en sia patria, la Tschechia.
Michael Fora e Simon Knak van medemamain davent da Tavau. Clar che la tensiun avant ils playoffs è uschia anc pli speziala che auters onns.
Fin il titel han ils da Tavau dentant anc ina lunga via. Tuttina, sch'i va tenor il giugader da Madulain, duai ses viadi a Tavau, avant ch'el mida a Berna tar il SCB, finir cun ses emprim titel da campiun svizzer.