Per il trenader dal HCD, Christian Wohlwend, èsi cler daco che sia equipa ha pers la seria da pre-playoff encunter ils Bernais. A la fin haja il goli dal SCB, Tomi Karhunen, fatg la differenza. Quai mussa er la statistica. Tar las duas terradas han ils da Tavau sajettà bler dapli sin il gol (statista da sajets 60:30 e 53:16).
En il mument decisiv n’ha il HCD pia betg profità da sia buna offensiva. Durant la qualificaziun era il campiun da record anc stà la segunda ferma equipa da l’entira liga cun 174 gols. Auter ha quai vesì ora tar la defensiva. Tavau ha laschà far 177 gols. Mender èsi ì be als Lakers ed als SCL Tigers.
Ils giugaders èn fitg trumpads, quai è logic, pertge els han dà tut.
Il HCD n’ha mai propi chattà l’equiliber tranter l’offensiva e la defensiva. Quest manco ha la finala er procurà che Tavau n’ha betg cuntanschì directamain ils playoffs ed uschia stuì giugar ils pre-playoffs ch’han gì quest onn premiera. Savens en questa stagiun han ils da Tavau sajettà 5 u 6 gols, ma lura er cassà 7 gols.
Du Bois ha mancà
In motiv per il deficit en la defensiun dal HCD èn franc er las blessuras da divers giugaders da tschep. Principal Félicien Du Bois ha mancà al HCD. Il schef da la defensiun era sa blessà durant la preparaziun sin la nova stagiun ed uschia returnà sin il glatsch pir la fin favrer. Suenter in’ulteriura blessura ha el curt suenter terminà sia carriera. Er l'engiadinais Claude-Curdin Paschoud ha giugà be 12 partidas cun il HCD, avant ch’el è sa blessà e gì ina brava scurlada dal tscharvè. Silsuenter ha el patì da problems cun la tatona.