Igl è stà in gieu guliv sur 60 minutas. La finfinala han ils Grischuns vulì pli fitg la victoria ch'ils draguns da Fribourg.
Resumaziun dal gieu
Il HCD ha mussà in bun emprim terz, è stà la meglra equipa. Mo suenter 20 minutas era il resultat 0:1 ord vista dals Grischuns. Killian Mottet ha sajettà l’emprim gol dal gieu en la 19avla minuta.
Il segund terz è lura stà in vi e nà, ditg senza grondas occasiuns da gol. En il powerplay ha Jacob De la Rose lura marcà il 2:0 per Fribourg en la 31avla minuta. La reacziun da Tavau è dentant vegnida e quai entras il topscorer Matej Stransky ch’ha sajettà l’emprim gol per il HCD cun in bel sajet direct en la 36avla minuta.
En l’ultim terz n’ha ditg betg bler funcziunà tar Tavau. Cun chastis ha l’equipa fatg grev la vita a sasez. Grazia ad in ferm Sandro Aeschlimann n’ha il HCD dentant betg cassà in ulteriur gol. E curt avant la fin han ils Grischuns sez pudì dar en powerplay. Puspè èsi stà Matej Stransky ch'ha cun in sajet direct tutgà per il HCD tar il 2:2.
La decisiun è crudada en la lutga da penaltis nua che Leon Bristedt ha sajettà il gol decisiv suenter ina lunga lutga da penaltis.
Grazia a questa victoria è Tavau da nov sin plazza 5 da la tabella. Vinavant per ils Grischuns vai pir puspè ils 20 da december. Lura dat il HCD ordaifer encunter Bienna, ch'è actualmain sin plazza 2 da la tabella.
