Ch'il duel tranter il HCD ed il SCB vegnia a vegnir stretg han ins pudì supponer. Avant il segund duel aifer 48 uras eran las duas equipas mo quatter puncts in ord l’auter. Uschia era er la partida fitg stretga. Ditg è il club da hockey da Tavau dentant currì suenter ad in gol. Pir en la 56avla minuta è quai grategià a Leon Bristed dad egualisar la partida e da sfurzar uschia ina prolungaziun. En quella ha alura mancà la fortuna. Ramon Untersander ha decidì il gieu ed uschia procurà per la sconfitta dal HCD.
Fin da la stagiun e cumià da Tavau per Nygren
En la 39avla minuta cupitga il schef da la defaisa dal HCD Magnus Nygren senza influenza dad in adversari. Nygren è restà sin il glatsch e sto vegnir purtà en la gardaroba dad in congiugader e dal medi. Quai è deplorablamain stada la davosa acziun da Nygren sin glatsch svizzer. El s'è rut la stgain e l'oss da ventrigl. Gia glindesdi bun'ura è el vegnì operà. Cun quai van a fin ses baud ses onns a Tavau. Il defensur svedais turna suenter questa stagiun puspè en sia patria.
Berna cun blers blessads
Actualmain ha l’equipa da la chapitala da sbatter cun numerus giugaders ch’èn ferids. Gist la defaisa è pertutgada il pli ferm. Quatter defensurs dal SC Berna mancan, u ch'els han stuì vegnir remplazzads. La glista dals blessads da Tavau è main lunga. Dentant ha er il HCD inqual giugader ferì.
