HEMA - A Cuira vegn cumbattì cun la spada lunga

Dapi l'entschatta da l'onn datti a Cuira in club da HEMA. En la «Schwertschule Chur» mussa il trenader la Engalterra Jake Free ad interessads ed interessadas il cumbat cun la spada lunga. Ina giada per emna s'inscuntra la gruppa en halla, montescha ils protecturs e prenda la spada en omadus mauns.

L'emprim fan tuts exercizis cun singuls moviments per survegnir rutina cun l'arma. Cur che tuts èn sa stgaudads cumenza la pratica en pèrs. L'ina attatga e l'auter sa defenda – co definescha il trenader. Uschia emprendan ins differentas attatgas e reacziuns sin quellas – e reacziuns sin las reacziuns.

La fin dal trenament è lura il punct culminant per blers: il «sparring». Ils cumbattants e las cumbattantas tiran en tut la protecziun. Giacca, masca, guants, protecturs per ils cumbels – e betg emblidar il protegiagenitalias. Uss na vai betg pli per exercizis fixads, uss vai per tutgar l'opponent – senza vegnir tutgà sez. Tgi che n'ha anc betg suà vegn uss bletsch. Suenter quest cumbat, er sche quel dura be in pèr minutas èn tuts senza flad. Fatg pasch vegn lura anc tar in sitg.

Tge è HEMA?

Ditg curt: las tecnicas da cumbat ch’eran derasadas en l’Europa dal 13avel fin al 17avel tschientaner.

HEMA stat per «Historical European Martial Arts», quai cumpiglia dar spadas cun differents tips da spadas, dentant era il cumbat senza armas, pia lutgar, u il cumbat a chaval. La gronda differenza tar las arts da cumbat da l’Asia è, ch’i na dat nagina cuntinuitad dapi l’entschatta da l’art. Nua ch’il kung-fu ed auters stils da l’Asia èn vegnids sviluppads vinavant, datti ina rusna da radund 300 onns tar las bleras disciplinas da HEMA.

La furma «moderna» sa basa or da quest motiv sin l’interpretaziun e la recreaziun da las tecnicas descrittas en cudeschs dals vegls maisters. L’entschatta fan oravant tut documents da lingua tudestga, encunter la fin domineschan oravant tut maisters talians – ins discurra era da la «scola» tudestga u taliana. Plinavant hai era dà la scola englaisa, franzosa e spagnola. Enconuschents maisters èn Liechtenauer per la scola tudestga, e Fiore per la taliana.

Quels maisters han sviluppà tecnicas per l’uschenumnà «Blossfechten», pia il cumbat senza armadira – per la populaziun civila, e betg per temp da guerra. La sfida per quels che vulan recrear quest «Blossfechten» è, ch'ils maisters n'han per part betg declerà fitg exact co ina tecnica vegn fatga, e per part era duvrà differentas expressiuns per il medem, respectivamain il medem pled per differentas chaussas.