L'emprima buna schanza han bain las Svizras gì. Ma Lara Stadler ha tutgà be la pitga ed ha uschia manchentà da metter la Svizra en avantatg. Per las victuras dals gieus olimpics dal 2018, para quai d'avair dà in stausch. Curt suenter han ellas gia manà durant in powerplay. Suenter in culp dubel entaifer 9 secundas, èsi suenter gia stà 0:3 ed a la fin da l'emprim terz eri tar 0:5 ord vista Svizra.
Il trenader ha lura reagì suenter l'emprim terz ed ha remplazzà la golia Saskia Maurer cun Andrea Brändli, ch'è gia stada durant ils emprims dus gieus tranter las pitgas. La midada ha lura er gì effect. Brändle ha laschà en be trais gols ed ha tegnì 41 sajets.
Uschia vai vinavant
Glindesdi a las 14:10 dattan las Svizras l'ultim gieu en la fasa da gruppa e quai encunter la Finlanda. Las Finlandaisas han pers lur emprimas duas partidas encunter ils Stadis Unids ed il Canada. Venderdi e sonda han lura lieu ils quartfinals.
La Svizra ha strusch pli schanzas da vegnir terza en la gruppa. Lura avess l'adversari en la runda da K.O. num cun gronda probabilitad Russia u Finlanda.