La partida dal HCD encunter ils Rapperswil Jona Lakers ha cumenzà mal per ils Grischuns. Malgrà ch'il HCD ha empruvà da mussar tgi ch'è il patrun chasa ha Rapperswil fatg l’emprim gol. A quel 0:1 è il HCD currì suenter passa in quart ura. En il segund terz ha il Club da hockey da Tavau dentant chattà meglier la furma. L’equipa grischuna ha l’emprim egualisà ed alura anc vulvì la partida.
Victoria impurtanta
Gia avant la pausa da la squadra naziunala l’entschatta da november aveva il Club da hockey da Tavau gì fadia da gudagnar partidas da hockey. I mancava la constanza. Dentant è la situaziun da lezzas uras da declerar cun ils numerus ferids ch'il HCD ha stuì magunar. Per l’emprima giada dapi lung temp ha il trenader Christian Wohlwend savì disponer en il gieu encunter il SC Berna puspè da tut ils giugaders esters. Il lazaret tar il Club da hockey da Tavau è vegnì pli pitschen è quai fa bain al gieu da l’equipa grischuna. Suenter la segunda victoria da la fin d’emna è il HCD en contact cun las emprimas sis plazzas da la tabella. Quellas garanteschan ina qualificaziun directa als playoffs.
