La differenza en quest gieu da chasa cunter il HC Lugano ha Tavau fatg en il segund terz. Suenter ch’i steva anc 0:0 suenter las emprimas 20 minutas, ha l’equipa da Christian Wohlwend sajetà trais gols en il segund terz. Julian Schmutz (29), Andres Ambühl (35) e Lukas Stoop (39) han sajetà ils trais gols entaifer 10 minutas.
In dals garants per la victoria dal HCD è er il goli Sandro Aeschlimann stà. Cun sias paradas ha el procurà ch’ils attatgaders da Lugano èn quasi sa desperads vid il goli da 26 onns. En tut ha el mussà 45 paradas.
Per il HCD è la victoria cunter Lugano stà la terza victoria en roda. L’ultima fin d’emna han ils Grischuns gudagnà cunter Ajoie ed il mardi cunter Genevra.
Avant il gieu
Fin qua è la stagiun in si e giu per il club da hockey da Tavau. Anc mai han ils Grischuns pudì festivar dapli che duas victorias en seria. Dentant n'hai era anc betg dà dapli che duas terradas en roda per l'equipa da Christian Wohlwend.
Igl è in fatg ch'il HCD è anc in zic a la tschertga da ses meglier hockey. En ils ultims dus gieus han ins dentant pudì constatar che l'equipa vegn plaunsieu en furma. A chasa cunter Ajoie han els gudagnà cun gist 6:0 ed ordaifer cunter Genevra han els gudagnà cun 3:2, quai grazia ad ina gronda effizienza avant il gol ed in gieu fitg disciplinà en la defensiva.
Aeschlimann u Senn?
Ina dumonda che sa tschenta: Tgi è insumma il numer 1 en gol tar Tavau? Èsi Gilles Senn ch'è turnà da l'America dal Nord la stad suenter dus onns u èsi Sandro Aeschlimann ch'è dapi dus onns tar ils Grischuns? Al cumenzament ha Gilles Senn, per gronda part, survegnì la fidanza dals trenaders. El n'ha dentant betg pudì persvader dal tuttafatg. Quai mussan era sias statisticas. En ils otg gieus ch'el è stà en acziun ha el parà 89,7% dals sajets. Sandro Aeschlimann ha pir dà quatter gieus, tranter auter ils ultims dus, nua ch'el ha parà 93,4% dals sajets. Tut quai ch'è sut 90% vala plitost sco flaivla quota en il sport da hockey, sur 93% è percunter ina fitg ferma quota.
