Suenter trais terradas cleras han las dunnas sut il trenader Colin Muller mussà la reacziun spetgada cunter la Finlanda. Fatg la differenza han las Svizras cunzunt puncto effizienza. Lara Stalder ha sajettà il gol decisiv. Tuttina ha il team svizzer stuì tremblar fin la fin. La Finlandaisa Elisa Holopainen ha numnadamain anc sajettà 10 minutas avant la fin il 2:3. Ina ferma prestaziun ha danovamain mussà Andrea Brändli en il gol. Ella ha tegnì 38 sajets da las Finlandaisas.
Grazia a la victoria han las Svizras anc la schanza sin plazza trais e cun quai sin in duell da quartfinal cunter in team da la gruppa B. Pli probabel è però ch'ellas fruntan en il cumbat per il mez final anc ina giada sin la Finlanda ubain sin las Russas. Ils quartfinals èn lura venderdi e sonda.