Siglir tar il cuntegn

Header

audio
I vegn stretg cun spustar gieus en la National League dal hockey
Or da Actualitad dals 05.01.2022.
abspielen. Laufzeit 3 minutas 46 Sekunden.
cuntegn

Hockey National League I smanatscha in caos da termins

7 equipas da la liga naziunala sa chattan il mument en quarantina, tranter quellas er il HCD. Numerus gieus han gia stuì vegnir spustads. Pervia dal coronavirus smanatscha il collaps a la stagiun da hockey.

Sco proxima equipa da la liga naziunala sto er Friburg ir preventivamain en quarantina pervi da plirs cas da corona. Quai ha communitgà il club. Sch’il medi chantunal conferma la quarantina, stuessan las partidas da damaun cunter Losanna e sonda cunter Ambri vegnir spustadas.

Covid-19 dictescha ils gieus

Suenter trais mais senza problems vegn la National League danovamain – sco gia l’onn passà – scurlada da Covid-19. Cun il HCD (dapi ils 25-12), Zug e Lugano (dapi ils 28-12), Losanna (dapi ils 29-12), Ajoje (dapi ils 30-12) e Berna (dapi ils 2-1) sa chattan actualmain set equipas en quarantina. Plinavant han ils Rapperswil-Jona Lakers serrà las portas e terminà ad interim ils trenaments.

Termins libers èn rars

Fin uss han 15 gieus stuì vegnir spustads. Il plan da gieu sa mida da di tar di. L’organisaziun da la National League cun il directur Denis Vaucher èn vid eruir termins da reserva. Ma quai n’è betg uschè simpel. Quasi l’entir favrer è occupà cun ils gieus olimpics a Peking (dals 4 – 20 da favrer) e suenter la fasa da playoffs cumenza gia bainbaud il campiunadi mundial da hockey en la Finlanda (dals 13 – 29 da matg).

Ils clubs e la National League sa tegnan il mument vid la strategia da cuntinuar cun il campiunadi. Rumper giu la stagiun na stat il mument betg en discussiun. Il proxim gieu dal HCD fiss planisà ils 14 da schaner ordaifer encunter Friburg-Gottéron.

RTR actualitad 17:00

Artitgels legids il pli savens

Scrollar a sanestra Scrollar a dretga