Ch’il HCD ha per tut pretsch vulì questa victoria encunter ils ZSC Lions ed er suenter las duas terradas encunter Ajoie e Friburg la davosa fin d’emna han ins vis gia al cumenzament dal gieu. Durant las emprimas 10 minutas n’ha il HCD laschà nagina schanza a Turitg e gì schanzas tut a dubel, tranter auter er entras in penalti che Enzo Covi n’ha betg pudì nizzegiar. Pir entras dus chastis encunter Tavau han ils Lions chattà la via en il gieu. Gols n’hai dentant dà nagins en l’emprim terz.
Decisiun en il segund terz
Per la decisiun ha il HCD procurà cun quatter gols en il segund terz. En la 21avla minuta èsi reussì a Marc Wieser da sajettar il 1:0. Be 42 secundas pli tard dentant la resposta da Turitg. Victor Backman ha pudì egualisar per ils ZSC Lions, in gol che n’ha dentant betg bittà Tavau ord il ritmus. Anzi, en la 25avla minuta sajetta il topscorer dal HCD, il Svedais Mathias Bromé, il 2:1 en powerplay e curt suenter augmenta il Tschec Matej Stransky al 3:1. Curt avant la fin dal segund terz gartegi anc a Chris Egli da sajettar il 4:1.
En il davos terz ha il HCD per gronda part controllà il gieu uschia ch’ils ZSC Lions n’è betg pli vegnir da midar insatge vid il resultat. Per Tavau èsi l’emprima victoria encunter ils Turitgais dapi il mars 2019. Grazia a questa victoria è il HCD da nov sin il terz plaz da la tabella, be dus puncts davos il nov leader, l’EV Zug. Ils ZSC Lions sco 6avels han gia 13 puncts retard sin Tavau.
Per il HCD cuntinuescha il campiunadi mardi proxim, ils 30 da november. Lura frunta Tavau a chasa sin ils SCL Tigers.
