«Per la Svizra èsi impurtant che nus essan represchentads en il gremi dal IIHF», quai di Raeto Raffainer ch'è vegni tschernì en l’emprim scrutini en il gremi, l'uschenumnà council da la Federaziun Internaziunala da hockey. Suenter ch'il president Renè Fasel ha dà giu il presidi da la Federaziun Internaziunala da hockey suenter 24 onns, vuleva Swiss Ice hockey puspè in represchentant svizzer en quest gremi. Uschia han ins decidi da proponer Reato Raffainer sco nov candidat, e Raffainer è vegni tschernì.
Decider davart il hockey cun las grondas naziuns
Cun seser en il council da la Federaziun Internaziunala da hockey è la Svizra en l’emprima retscha dal hockey mundial. Ensemen cun ils auters commembers dal gremi pon ins purtar en novas ideas, e dalunga reagir sch'ina nova idea è sin maisa. Il contact è uschia segir bler pli direct, e la Svizra ha uschia er influenza sin tschertas decisiuns.
Nagin problem da coordinar il nov uffizi cun il SC Berna
Il nov pensum da Raeto Raffainer è var 15%. Per il nov commember da la Federaziun Internaziunala da hockey n'è quai nagin problem da coordinar quest pensum cun sia lavur sco Chief sports officer tar il SC Berna. Malgrà che Raeto Raffainer è responsabels en questa funcziun per tut las partiziuns e per tut las equipas dal SC Berna, po el coordinar quella lavur bain cun sia nova lavur strategica tar la Federaziun Internaziunala da hockey.