«Deja vu» en las ligas da hockey pli bassas. Sco gia la stagiun passada è il campiunadi puspè interrut pervia da la pandemia. Quai enfin ils 27 da schaner 2022. Suenter duai il campiunadi gest cuntinuar cun ils playoffs.
Pertutgadas èn las squadras da l'emprima fin la quarta liga ed era la liga naziunala D da las dunnas. La decisiun vala er per tut las partiziuns da juniors fin tar las equipas dad U17.
Decisiun da la Federaziun Svizra da hockey
Pertutgadas da l'interrupziun èn era diversas equipas grischunas. Tranter auter en l'emprima liga Partenz Signuradi ed en la segunda liga l’EHC San Murezzan, il CdH Engiadina e l’EHC Lai Valbella. En la terza liga tut las equipas da hockey en Engiadina e las valladas dal sid.
Vitiers è il campiunadi era interrut per las dunnas dal SC Schlarigna en liga naziunala D. Unic las dunnas dal Cdh Engiadina pon anc giugar vinavant. Ellas dattan en la liga naziunala C.