Il gol decisiv ha Hannes Björninen marcà cun deviar il puck suenter 31 secundas dal davos terz. Per l’attatgader da Jokerit Helsinki èsi stà l’emprim gol insumma en il turnier olimpic. Björninen aveva gia preparà en la 24avla minuta l’egualisaziun, tras il defensur Ville Pokka. Ils Russ eran ids en avantatg durant in powerplay en l’otgavla minuta – marcà aveva Michail Grigorenko.
Suenter marcar il 2:1 han ils Finlandais mussà cun disciplina in gieu defensiv. Ils Russ da lur vart han en il davos terz sulettamain sajettà trais giadas sin il gol finlandais.
Dals tschintg giugaders da la Finlanda, che dattan en Svizra e ch’eran en la squadra dal final – han quatter lura propi dastgà dar: Juuso Hietanen (Ambri), Sami Vatanen e Valtteri Filppula (omadus Genevra) e Harri Pesonen (SCL Tigers). Toni Rajala da Bienna n’ha betg dastgà vegnir en acziun.