Siglir tar il cuntegn

Header

cuntegn

Hockey Svizra è en il mezfinal dal campiunadi mundial

Il proxim campiunadi mundial ha lieu en Franscha

Avrir la box Serrar la box

L'onn 2028 ha il campiunadi mundial da hockey sin glatsch lieu en Frantscha – a Paris ed a Lyon.

Igl è la terza giada, suenter 2017 e 1951, che nos pajais vischin è ospitant dal campiunadi mundial.

La Svizra è sa qualifitgada per il mezfinal dal campiunadi mundial en Tschechia. L’equipa dal trenader Patrick Fischer ha gudagnà cunter la Germania cun 3:1. Per la Svizra èsi l’emprim mezfinal dapi il 2018. Ordavant han ils Svizzers pers quatter giadas en seria cunter ils Tudestgs en la fasa da k.o.

video
Il gieu Svizra-Germania
Or da Sport-Clip dals 23.05.2024.
laschar ir. Durada: 7 minutas 14 Secundas.

L’um da la partida è stà Christoph Bertschy ch’ha gist fatg dus gols per ils Svizzers. En il mezfinal frunta la Svizra damaun a saira sin il Canada. En l’auter mezfinal frunta la Tschechia sin la Svezia.

video
Tschechia gudogna cnap cunter ils Stadis Unids
Or da Sport-Clip dals 23.05.2024.
laschar ir. Durada: 4 minutas 53 Secundas.

Davos gieu da gruppa

La squadra naziunala svizra da hockey sin glatsch terminescha la fasa da gruppa sin posiziun dus da la gruppa A. L'equipa dal trenader Parick Fischer ha gudagnà il davos gieu da gruppa cunter la Finlanda cun 3:1. En il quartfinal da gievgia frunta la Svizra sin la Germania, pia sin l'adversari ch'aveva bittà or dal turnier ils Svizzers l'onn passà.

Las ulteriuras partidas dal quartfinal:

  • Canada – Slovachia
  • Svezia – Finlanda
  • USA – Tschechia

Emprima terrada en la 6avla partida

La squadra naziunala svizra da hockey sin glatsch ha pers la 6avla partida dal campiunadi mundial en Tschechia. Cunter il Canada hai dà ina terrada da 2:3. Igl è l'emprima partida che la naziunala svizra ha pers tar quest campiunadi. Per ils quartfinal eran ils Svizzers però sa qualifitgads gia l'emna passada. Suenter la 5avla victoria eri cler: L'equipa dal trenader Patrick Fischer è ina runda vinavant.

5avla victoria – 8:0 cunter il Danemarc

La Svizra è sa qualifitgada anticipadamain per il quartfinal. Il team da Patrick Fischer ha era gudagnà la 5avla partida, quai cunter il Danemarc cun 8:0.

Suenter las tschintg victorias ha la Svizra 14 puncts e na po betg pli crudar or dals top 4 da la gruppa A. La Svizra ha cunquai cuntanschì per la settavla giada en seria il quart-final da las meglras otg equipas. I mancan anc duas partidas da gruppa, la dumengia dat la Svizra cunter il Canada ed il mardi cunter la Finlanda.

Quarta victoria – 3:0 cunter la Gronda Brittania

Al campiunadi mundial da hockey sin glatsch en la Tschechia ha la Svizra pudì festivar la quarta victoria en quatter partidas. Il team da Patrick Fischer ha gudagnà cunter la Gronda Britannia cun 3.0. Suenter l'emprim terz ha la Svizra manà gia cun 2:0, quai grazia als gols da Nico Hischier (4.) e Dean Kukan (14.) Il terz gol ha fatg il Grischun Nino Niederreiter en la 39avla minuta. Il trenader svizzer, Patrick Fischer sa mussa cuntent suenter la partida, vesa però era anc potenzial.

video
Fischer: «Nus avain gì la dretga tenuta»
Or da Sport-Clip dals 15.05.2024.
laschar ir. Durada: 2 minutas 4 Secundas.

Grazia a questa victoria è la Svizra puspè a la testa da la tabella da la gruppa A cun 2 puncts dapli che la Tschechia ch'è sin plazza dus suenter la victoria da 7:4 cunter il Danemarc.

Terza victoria – 2:1 cunter la Tschechia

La squadra naziunala svizra ha era gudagnà sia terza partida. Quai cunter la Tschechia cun 2 ad 1 suenter sajettar penaltis. Kevin Fiala ha tutgà per la Svizra en la 14avla minuta. L'attatgader tschec dal HCD Matej Stransky ha gulivà la partida suenter 36 minutas.

En il sajettar penaltis han Fiala e Philipp Kurashev tutgà per la Svizra. Per ils Tschecs ha be Stransky tutgà.

Segunda victoria – 6:5 cunter l'Austria

Ils Svizzers han gudagnà cunter l'Austria cun in 6:5. Quai è la segunda victoria per la squadra naziunala dapi ch'il campiunadi mundial ha cumenzà en la Tschechia.

Il gol decisiv cunter l'Austria è dentant crudà pir en la davosa minuta. Marcà quel ha Nico Hischier, ch'ha fatg en tut trais gols en questa partida.

Bun cumanzament – 5:2 cunter Norvegia

La squadra naziunala da hockey ha cumenzà il campiunadi mundial en la Tschechia cun in success. Ils umens dal trenader Patrick Fischer han battì la Norvegia a Prag cun 5:2. L'emprim terz da la partida è stà stentus per ils Svizzers, suenter èn ils favurits vegnids sin turas.

Aifer stgars nov minutas han Romain Loeffel (25.), Sven Senteler (29.) e Tristan Scherwey (34.) sajettà la Svizra cun 4:1 en avantatg. En il davos terz ha il Grischun Nino Niederreiter lura anc marcà il 5avel gol svizzer.

RTR novitads 23:00

Artitgels legids il pli savens