Duas stagiuns ha la giuvna Sandra Schmidt da Sent dà hockey cun l’equipa da Kreuzlingen-Konstanz en la segund meglra liga da hockey da las dunnas, la liga naziunala B. L’onn passà è vegnida fundada cun giugadras da Kreuzlingen-Konstanz e da l’equipa da las dunnas da Weinfelden ina nova equipa: la squadra Thurgau Indien Ladies. Gia l’emprima stagiun en la meglra liga da hockey da las dunnas è la squadra sa qualifitgada per ils playoffs. En l’emprima runda s’entaupan las dunnas da Thurgau cun l’equipa feminila da Lugano.
Playoff encunter fin da la stagiun
Entant che Sandra Schmidt po s'allegrar da la pli bella fasa da l’entira stagiun, han ils dus frars Dario e Linard Schmidt gia daditg mess a lieu ils patins ed ils bastuns da hockey. Sco tar tut tschellas ligas da hockey pli bassas era, è la stagiun dal Cdh Engiadina en segunda liga vegnida stritgada dal tuttafatg gia avant Nadal. Suenter ch'ils differents campiunadis eran vegnids interruts l'october da l’onn passà è vegni decidi cun la segunda unda dal coronavirus da betg pli entschaiver a dar hockey. Uschia san ils dus frars Schmidt uss sustegnair e mirar tiers a la sora giuvna, a Sandra Schmidt.