Ils gieus olimpics a Peking na stevan betg sut ina buna ensaina. Corona e la situaziun dals dretgs umans en la China han dà ina pulita sumbriva als gieus olimpics.
Organisatoricamain è l'occurrenza stada messa sin pe a moda exemplarica. Insatge ch'era è da spetgar da la China. Els han vulì sa preschentar al rest dal mund da lur meglra vart. Cun numerus voluntaris, atgnamain bler memia blers – han els gidà a sportistas e sportists, funcziunaris ed er a nus schurnalists da vegnir a frida durant las bun duas emnas.
Co han noss redacturs a Peking resentì ils gieus olimpics? Ad Andreas Wieland e Gian Carlo Candinas restan en mintga cas ina pluna regurdientschas persunalas dals gieus olimpics 2022.
In tren da hightec
En il Grischun è la Viafier retica trumf sch'i va per ir cun il tren. In tren patgific che n'ha betg la finamira dad esser il pli spert. Tut auter en China. Ils Chinais èn enconuschents per lur trens d'auta spertadad. In tren tut spezial va sin il tschancun tranter Peking e Zhangjiakou, il lieu nua che tut las disciplinas nordicas han gì lieu durant ils gieus olimpics. Sin fin a 350 kilometers l'ura po quest tren accelerar.
Andreas Wieland e Gian Carlo Candinas han fatg in viadi cun quest tren.
Naiv nova als gieus olimpics
La regiun dals gieus olimpics 2022 è ina da las pli sitgas regiuns en la China. Naiv giu da tschiel è insatge fitg stgars durant ils mais d'enviern. Perquai è er tut la naiv als gieus olimpics, saja quai sin pista u sin loipa, naiv artificiala. Sch'i dat tuttina ina giada naiv en la regiun da Peking è quai ina mesa sensaziun.
La sonda ils 12 da favrer hai dà 2 centimeters naiv. Ils maletgs co ils Chinais fan frunt a questa naiv – grondius. La dumengia hai lura perfin dà in zic dapli naiv. Cun tuttas maschinas pussaivlas è la naiv vegnida rumida.
Ils voluntaris – divertents
Els èn stads dapertut durant ils gieus olimpics – ils voluntaris. U cun lur unifurma d'astronauts u savens er cun lur giacca uffiziala blau-alva dals gieus olimpics. Èn els gidaivels? Gea fitg! Amicabels? Gea era! Discurran els englais? Mo ils pli paucs ...
Nus n'enconuschain betg il dumber da voluntaris als gieus olimpics a Peking. I sto dentant esser in aut dumber. Memia blers, per esser sincer. Per metter a lieu: Là nua ch'i tanschess ina persuna, eran almain trais persunas en acziun.
Test da corona – di per di
Sch'i va per il coronavirus n'enconuscha la China nagin pardun. Durant tut il temp èsi stà da purtar mascrina, cun excepziun dal temp ch'ins mangia u dorma. Plinavant hai gì num da far mintga damaun in test da PCR. Laschar far il test da corona è stà in termin fix per noss dus reporters, mintga bunura tranter las 6:00 e las 9:00. Quel vegn fatg en bucca, e betg en il nas sco tar nus en Svizra.
Noss dus reporters Andreas Wieland e Gian Carlo Candinas èn suenter bun in'emna als gieus olimpics, gia stads disads vid questa procedura.
Viadi da Cuira fin a Zhangjiakou
- Sin la plazza aviatica èsi stà da mussar e preschentar formulars senza fin. E quai adina puspè. Formulars per survegnir il consentiment d'entrar en la China. Sin la plazza aviatica a Peking èsi plinavant stà da spetgar bun e ditg.
- Il viadi cun il bus da Peking a Zhangjiakou è lura stà in'aventura speziala. Bunamain sis uras ha il viadi da radund 200 kilometers cuzzà. Differents bus cun sportistas, sportists e schurnalists èn vegnids escortads da la polizia chinaisa.
- In'ulteriura sfida è stada la lingua. Englais san mo ils pli paucs Chinais. Perquai èsi da discurrer cun pes e mauns. Malgrà la barriera da lingua èsi da menziunar che las persunas èn fitg amiaivlas e curtaschaivlas.