I na vul simplamain betg esser. La Svizra sto vinavant spetgar sin ina victoria cunter la Svezia ad in campiunadi mundial. Malgrà ina buna prestaziun perdan ils unihockeyans la fin finala cler cun 1:6.
Ditg la meglra equipa
Spezialmain en las emprimas 40 minutas ha la Svizra mussà ina fitg buna partida. Ils Svizzers han perfin gì dapli dal gieu ed er dapli occasiuns da gol. Il resultat suenter 40 minutas era tuttina 1:2 ord vista svizra. Il sulet gol ha Claudio Laely sajettà en la 25avla minuta.
En l'ultim terz han ils Svizzers incassà baud il 1:3. Sin quest gol n'èn els betg pli vegnir da reagir. Anzi, il cuntrari. En las ultimas minutas han ils Scandinavs anc pudì auzar il resultat.
En il gieu cunter la Finlanda u la Tschechia ha la Svizra damaun anc la schanza da gudagnar la medaglia da bronz.
I è in sport d'equipa e la fin finala gudognan ils Svedais
Tuttina en tge sport d'equipa: Ballape, hockey sin glatsch, curling ni er unihockey. La Svezia fa dapi onns in pau sgarschur als fans dal sport svizzer. Terradas en gronds gieus èn vegnidas standard cunter ils Scandinavs. Anzi, il cuntrari.
In schatg d'intginas terradas svizras encunter la Svezia dals ultims onns
- 19 da matg 2013: La naziunala svizra da hockey perda en il final dal campiunadi mundial cun 1:5 encunter la Svezia.
- 20 da matg 2018: Puspè fruntan ils hockeyans svizzers sin la Svezia. Puspè datti ina terrada.
- 3 da fanadur 2018: La naziunala da ballape perda en l'otgavelfinal dal campiunadi mundial en Russia cun 0:1 cunter ils Svedais. Quai suenter ina fitg flaivla prestaziun.
- 16 da settember 2018: En la cuppa Davis da tennis perda la Svizra il duel cunter la Svezia cun 2:3. Igl è dentant da menziunar che Roger Federer e Stan Wawrinka n'eran betg da la partida.
- Quasi mintg'onn: Sche la Svizra frunta en il sport d'unihockey sin la Svezia datti quasi mai insatge da giubilar. Tuttina sch'igl è ils umens u las dunnas. Ils umens n'han anc mai gudagnà cunter ils Svedais ad in campiunadi mundial - las dunnas han pers l'emna passada il mezfinal dal campiunadi mundial cun 1:14.
