- Ils Grasshoppers gudognan cun 3:2 cunter Son Gagl en la segund davosa runda da la Super League. Il club turitgais è uschia sin buna via da restar en la pli auta liga.
- Lucerna cumenza catastrofal cunter YB e vegn la finala tar in 2:2. Ord atgna forza na tanschì betg pli d'evitar la barrascha.
- Quai perche che Sion gudogna cunter Losanna, grazia ad in penalti realisà en il temp supplementar dal gieu. Ils Vallesans dovran uss sulet anc in punct.
Tant ils Grasshoppers sco Sion stattan ina runda avant la fin da la stagiun cun trais puncts avant Lucerna. E GC è grazia a la differenza da gols tant sco salvà. Lucerna sto gudagnar en la davosa runda cunter il FCZ e sperar che Sion sperdia cunter Servette, per pudair mitschar da la barrascha.
| Plaz | Club | Puncts | Differenza da gols | Davos adversari |
| 7 | Grasshoppers | 40 | 54:55 | YB (ordaifer) |
| 8 | FC Sion | 40 | 43:64 | Servette (chasa) |
| 9 | FC Lucerna | 37 | 49:62 | FC Turitg (ordaifer) |
Lucerna sto tremblar il pli fitg
Il punct che Lucerna ha fatg cun giugar pari 2:2 cunter ils Young Boys, pudess esser memia pauc per mitschar da la barrascha. Il gieu ha cumenzà sgrischaivel per Lucerna, suenter 6 minutas stevi gia 0:2. Ils Lucernais èn dentant sa dasdads ed han procurà per ina partida spectaculara. Cun in gol avant la pausa ed il segund en la 69avla minuta han las stenzas purtà fritg. Dentant il gol da la victoria n'han ils Lucernais tuttina betg pli pudì marcar.
Ils Grasshoppers han gudagnà cun 3:2 cunter Son Gagl. Tar la pausa manava GC cun 2:0. Cun in penalti ha Son Gagl lura pudì scursanir. En la 80avla minuta ha il terz gol per GC lura pudì quietar in pau las gnarvas dals Turitgais.
Sion ha fatg ils trais puncts impurtants ordaifer cunter Losanna, cun in 2:1. Igl 1:0 sajettà cun in penalti en la 32avla minuta ha Sion pudì tegnair ditg. Cura che Losanna ha dentant egualisà en la 82avla minuta, ha Sion stuì reagir. En il temp supplementar han ils Vallesans lura survegnì in ulteriur penalti, questa giada in dispitaivel – e realisà quel a la victoria da 2:1.