I è stà ina partida da tremblar e morder unglas, da daguts da suaditsch da la gnervusadad. E quai tant per ils fans talians, sco era per ils fans da la Bosnia-Erzegovina. La fin finala han ils fans da la Bosnia pudì giubilar. 1:1 era il resultat suenter 120 minutas ed en la lutga da penaltis han ils giugaders talians mussà gnervas, fertant che tut ils giugaders da la Bosnia han tutgà.
-
Bild 1 von 2. Plaschair senza fin tar la Bosnia suenter la gronda victoria encunter l'Italia. Bildquelle: Keystone.
-
Bild 2 von 2. Consternaziun totala tar l'Italia suenter la terrada. Bildquelle: Keystone.
RTR ha contactà il di suenter quest gieu dramatic in grond fan da l'Italia, sco er in grond fan da la Bosnia-Erzegovina.
Stefano Staglianò (36)
Il bab da famiglia da 36 onns ha ragischs en la Calabria ed abita a Trun. Da puspè stuair spetgar quatter onns, fetgi mal. Dapi il 2014 spetga l'Italia gia sin ina qualificaziun per il campiunadi mundial. I saja sco sch'ina chasa da legos dessia ensemen. Ensemen cun collegas e confamigliars haja el gia filosofà in zic sur da quest gieu e ch'i n'ha puspè betg funcziunà. Quai gida per sa revegnir.
Spezialmain mal il cor fetschia che ses uffants ston uschia spetgar vinavant da vesair l'Italia ina giada al campiunadi mundial.
Spezialmain mal il cor fai per ils agens uffants che han anc mai vis in campiunadi mundial cun l'Italia.
Ari Kotoric (34)
El è naschì a Cuira e creschì si a Glion. Sias ragischs ha el dentant en Bosnia-Erzegovina. Per el èsi grev da chattar ils dretgs pleds il si suenter questa gronda victoria. «1-2 larmas èn idas». Per la populaziun en Bosnia muntia quai uschè bler. Els sappian emblidar ils problems per in di ed esser loschs e ventiraivels, manegia Ari Kotoric. El discurra da l'economia flaivla, da corrupziun u er da problems da faschissem.
Per in mument èn tut quels problems dal mintgadi davent e quai è grondius.
Per la Bosnia-Erzegovina èsi, suenter il 2014, la secunda participaziun ad in campiunadi mundial. En la fasa da gruppa fruntan els sin il Qatar, il Canada e la Svizra. E sin quest gieu sa legra Ari Kotoric gia fitg. «Jau gudogn, tuttina tge equipa che gudogna». Fatg è ch'i vegn emoziunalmain a vegnir intensiv.