Datti ils «pajais da ballape», u dependa quai mintgamai da la schlattaina? Las datas èn cleras. L'entusiassem per il ballape po en general tschiffar omaduas schlattainas.
Fans dal ballape san: Mo perquai che l'equipa da dunnas è ferma, na vul quai betg dir ch'era l'equipa dals umens mussa bunas prestaziuns. Il meglier exempel èn ils Stadis Unids. Durant ch'ils umens ston mintga giada ir a chasa baud a campiunadis mundials, èn las dunnas americanas ina classa per sa sezzas.
En la charta sut èn pajais cun gronda differenza colurads, blau munta che las dunnas èn plazzadas pli aut en la rangaziun da la FIFA che ils umens.
Ina da las equipas ch'è er per lunsch pli ferma ch'ils umens ed è adversaria da la Svizra al campiunadi mundial: L'equipa da las dunnas filippinas è sin plaz 46, ils umens perencunter èn rangads sin plaz 135.
Legenda:
L'equipa svizra da ballape tar il trenament
Keystone
Analisa da datas
Uschia pon ins tschentar la dumonda: Èn quai excepziuns, e datti insumma ina colliaziun tranter la fermezza da las equipas? In sguard en las datas dat ina resposta clera. En general è il success da las dunnas ed il success dals umens d'in pajais schon sumegliant. Pia ha in pajais cun ina ferma equipa da dunnas en general er ina ferma equipa d'umens.
Co vegn quai quintà or?
Avrir la boxSerrar la box
Ins po cumparegliar la rangaziun mundiala da la FIFA. Sche umens e dunnas èn circa medem fermas, èn els era plazzads sumegliantamain en la rangaziun.
La differenza (absoluta*) tranter la rangaziun da las dunnas e la rangaziun dals umens è decisiva. Sch'i na dat nagina differenza, lura è quella 0. Sche quella è gronda, lura munta quai che'ils rangs èn mintgamai fitg differents.
*la differenza absoluta è la differenza senza ensaina: ins lascha simplamain davent il «-»
Sch'ins va d'ina scala da 0 (umens e dunnas èn adina medem ferms) e 100 (la fermezza d'ina schlattaina n'ha da far nagut cun quella da tschella schlattaina), lura datti in resultat da 49. Pia è la fermezza tranter las equipas dal medem pajais colliada a maniera moderata.
Ils detagls da l'analisa
Avrir la boxSerrar la box
Ins po calcular la differenza absoluta dal ranking dals umens e da las dunnas dal medem pajais (per exempel Svizra: 20 – 12 = 8).
Lura summeschan ins quella per tut ils pajais en la rangaziun da la FIFA, e survegn «l'index da colliaziun».
Quai pon ins lura cumparegliar cun ina rangaziun cumplettamain artificiala. En questa survegn mintg'equipa simplamain ina rangaziun casuala.
Per interpretar l'«index da colliaziun» pon ins nizzegiar che quel è 0 sche la rangaziun da la FIFA dals umens e las dunnas è adina medema.
Sche l'«index da colliaziun» è plitost grond, u schizunt uschè grond sco tar las rangaziuns «artificialas», lura pon ins dir che la fermezza da las schlattainas n'ha mintgamai betg in connex.
L'analisa è fatga cun R. Sut quai link datti l'analisa cumpletta.
R Core Team (2022). R: A language and environment for statistical computing. R Foundation for Statistical Computing, Vienna, Austria. URL https://www.R-project.org/.
Fermezza dapenda da popularitad dal sport en il pajais
Er in'analisa statistica conferma: Igl è fitg probabel ch'i dat ina colliaziun tranter la fermezza da las equipas d'umens e da dunnas. Quai munta ch'i è fitg pauc probabel ch'ins mo per casualitad vesair ina tala colliaziun tranter las schlattainas en la rangaziun da la FIFA.
Per persunas che s'interesseschan per ballape probabel nagina surpraisa: La fermezza d'in pajais dependa da la popularitad dal ballape e d'ina ferma federaziun naziunala che promova la giuventetgna. Para po l'entusiassem per il ballape tschiffar omaduas schlattainas.
Co hai vesì ora avant 10 onns?
Avrir la boxSerrar la box
Pia pon ins vesair ch'i dat ils «pajais da ballape», n'emporta nagut tge schlattaina ch'i è.
Avant 10 onns, il 2013, han ins gia pudì constatar il medem fatg. Là esi dentant betg uschè cler sco ozendi. Quai pudess giaschair vi d'ina promoziun dal ballape da dunnas pli consequenta tras las federaziuns da ballape.
Dapi lura è er uschiglio girà bler: En la rangaziun da la FIFA chatt'ins ozendi 64 pajais dapli ch'anc avant 10 onns.
Tant pli interessant da guardar en la charta mundiala e vesair: En pajais da la Peninsla Araba e da l'Africa paran las squadras d'umens d'esser mintgamai pli fermas, en l'Asia dal sidost èsi il cuntrari. Per pajais sco l'Afganistan, l'Irac ed il Principadi da Liechtenstein na pon ins plinavant far nagina analisa: Là na datti insumma nagina equipa da ballape da dunnas.
