Siglir tar il cuntegn

Header

audio
Tokio 2020: L'emprim trenader da William Reais – Guido von Deschwanden
Or da Actualitad dals 02.08.2021.
laschar ir. Durada: 3 minutas 12 Secundas.
cuntegn

L'emprim trenader da Reais «Che quest giuven ha talent han ins vis immediat»

Guido von Deschwanden (65) è stà l'emprim trenader dal sprinter da Cuira, William Reais. El sa regorda gugent anavos vid il cumenzament.

Pir cun 16 onns ha William Reais fatg las emprimas experientschas cun il sport d'atletica leva. Ses emprim trenader è Guido von Deschwanden stà. Il trenader ch'è quasi in'instituziun el sport d'atletica leva en il Grischun ha trenà durant trais onns il giuven da Cuira.

El è simplamain in talent ed ha survegnì regalà las qualitads ch'i dovra per esser sperts.
Autur: Guido von Deschwanden Emprim trenader da William Reais tar il BTV Cuira

Il trenader sa regorda anc bain vid las entschattas cun William Reais. Che el haja talent hajans ins vesì immediat, dentant era ch'el ha dà ballapei avant, di Guido von Deschwanden cun in lev surrir. La cordinaziun da currer n'èra betg la meglra al cumenzament. Tecnicamain eri el propi in entschevider avant 5-6 onns. Il giuven atlet cun ragischs en il Portugal ed en l'Angola n'ha dentant betg schà starmentà da quai. El haja adina luvrà plain engaschi per sia finamira da vegnir pli sperts.

William Reais vid currer.
Legenda: Davent dal cumenzament è William Reais stà in atlet fitg ambizius, sa regorda ses emprim trenader Guido von Deschwanden. Keystone
Probablamain ha el anc trenà pli fitg davos mes dies. Quai è in segn ch'ins vul vegnir vinavant.
Autur: Guido von Deschwanden Emprim trenader da William Reais tar il BTV Cuira

La mischaida d'investar tut il pussaivel ed il talent han fatg che igl è quasi mo ì da stgala si cun William Reais. Entaifer 5-6 onns è el vegnì ina da las pli spertas persunas en Svizra e perfin campiun d'europa sut 23 onns els 200 meters. Quai è grazia a Guido von Deschwanden che ha accumpignà el durant ils emprims trais onns da sia carriera. Als gieus olimpics a Tokio è el in da mo dus Grischuns da la delegaziun svizra.

La premiera da William Reais

Avrir la box Serrar la box

L'urari per William Reais (sprint sur 200m) vesa ora uschia:

  • ils 3 d'avust 13:50 mezfinals
  • ils 4 d'avust vers las 15:00 final

RTR tegn sin il current via radio e sin rtr.ch.

RTR actualitad 07:00

Artitgels legids il pli savens