Suenter la davosa cursa da passlung ‘La Diagonela’ en Engiadin'Ota ha il comité d’organisaziun fatg sco adina ina evaluaziun. Suenter avair evaluà quai ch'ha funcziunà bain e quai che n'è betg dal tut gartegià han ins decis da far midada cun la partenza da la cursa roiala da Zuoz a Puntraschigna.
Trais puncts essenzials per far midada
La cursa da passlung en il stil classic da la Diagonela è terminada baud en la stagiun. Gia il schaner s’entaupan amias ed amis da cursas da distanza en il stil classic en Engiadin'Ota. Cun quai ch'il termin è uschia baud e la cursa ha lieu sin 1’700 meter sur mar, resta er ina cursa da mo 55 kilometers pretensiusa. Vegn tiers che cun scursanir la cursa han ins betg dad ir da l’Engiadina si atras il lai dad aria fraida tranter Zuoz e Samedan. E sco terz punct n'han ins cun la nova partenza a Puntraschigna era betg la problematica ch'ils pli sperts da la cursa sa cruschan cun ils pli plauns.
Tuttas cursas partan a Puntraschigna
Cun il nov concept èn uss tut las partenzas da las differentas cursas da ‘La Diagonela’ a Puntraschigna. Uschia han ins d'installar l’infrastructura da la partenza mo pli en in singul lieu. L’arriv da tut las cursas da ‘La Diagonela’ resta era en il futur amez il vitg da Zuoz.