L’istorgia da la partida da record dad Andres Ambühl, l’attatgader ha giugà sia 1'004. partida per il HCD, n’avess betg pudì esser pli dramatica. En in gieu che ha cumenzà cun in furioso dal HCD, en in gieu che Rapperswil fa mo en il terz d’amez trais gols, ed en in gieu nua ch'il HCD egualisescha la partida curt avant la fin e procura uschia per ina prolungaziun ed ina lutga da penaltis – ha a la fin gudagnà il patrun chasa. Suenter 16 penaltis han il HCD e surtut l’um da record Andres Ambühl pudì giubilar cun ina victoria.
Furioso al principi, gala da Cervenka e lutga da penaltis
La partida tranter il HCD e Rapperswil ha mussà tut quai che fa in gieu da hockey uschè attractiv. Il HCD che ha stort la partida en l’emprim terz. Rapperswil che ha alura fatg en il segund terz trais gols, ed il HCD che ha danovamain pudì egualisar il gieu curt avant il temp regular. E che sforza uschia ils giasts dal chantun Son Gagl en la prolungaziun, ed en la lutga da penaltis. Che gest l’um da record Andres Ambühl fa il gol decisiv – è sa chapescha il punct sin il «i» dad in gieu fitg spectacular.
Rapperswil è vegni cun in pèz lad a Tavau
Dapi la promoziun en la National League l’onn 2018 è Rapperswil l’equipa da surpraisa. La squadra sa cumpona fitg ferma. Er questa stagiun puspè. Anc avant Nadal ha Rapperswil battì il campiun EV Zug. E durant ils emprims dis da l’onn nov ha Rapperwil sajettà Langnau gist cun 9:0 or da l’atgna halla da glatsch. Rapperswil è pia vegnì cun in pèz lad a Tavau per il gieu encunter il HCD.
Las ulteriuras partidas
- Bienna – Kloten 5:4 suenter prolungaziun
- Fribourg – Ambri 6:1
- Genevra – Losanna 4:2
- Lugano – Berna 0:3
- ZSC Lions – Ajoie 2:3