Siglir tar il cuntegn

Header

video
Tavau perda l'emprima partida cunter Zug
Or da Sport-Clip dals 07.09.2021.
laschar ir
cuntegn

Liga naziunala Il HCD perda cunter Zug cun 2:5

La nova stagiun da hockey n’ha betg cumenzà tenor giavisch per il Club da hockey da Tavau: Il HCD ha pers l’emprima partida ordaifer cunter Zug cun 2:5. Suenter 43 minutas èn ils Grischuns gia stads en retard cun 0:3 cunter il campiun svizzer. Ils dus gols per il HCD han sajettà Chris Egli en la 49avla minuta e Mathias Bromé ina minuta pli tard.

Ils resultats dals ulteriurs gieus:

  • Ajoie – Bienna 1:3
  • Berna – Friburg 3:6
  • ZSC Lions – Genevra-Servette 4:2

L'istorgia da Fabian Ritzmann

Fabian Ritzmann da Scuol ha fatg l'emprendissadi da commerzi tar il Club da Hockey da Tavau ed ha giugà en differentas equipas da juniors tar il HCD. Dapi la stad passada è il giuven da 19 onns profi da hockey. L’emprim enviern ha el dentant passentà tar l’equipa partenaria dal HCD, ils «Ticino Rockets» da Biasca en la Swiss League.

L’idea davent da l’entschatta era quella, che Ritzmann avess ina liga pli bass il temp per far las emprimas experientschas en il hockey dals creschids, ed alura empruvar da far il pass en l’emprima equipa dal HCD.

audio
La sperta carriera da Fabian Ritzmann tar il HCD
02:43 min, Actualitad dals 07.09.2021.
laschar ir. Durada: 02:43 minutas.

Gia dà 10 gieus cun il HCD

A la fin da la stagiun passada è Fabian Ritzmann vegnì clamà dal HCD per las ultimas partidas da qualificaziun, e per trais partidas dals pre-playoffs a Tavau. Avant in mez onn ha el pia gia fatg sias emprimas experientschas en l’emprima equipa dal HCD.

Suenter la fin da la stagiun è el alura gist restà en il Grischun. Ensemen cun il HCD è Ritzmann sa preparà sin la nova stagiun. El ha era pudì dar quasi tut las partidas da preparaziun en il dress dal HCD. Uss fa el dentant in ulteriur pass. El po cumenzar la nova stagiun tar il HCD.

Cumbat per ina plazza fixa en il cader

La finamira principala dal giuven attatgader èsi da pudair restar tar il Club da hockey da Tavau. Perquai ha el da far la via che mintga giuven giugader da hockey ha da far: sur bunas prestaziuns. E quai en in dals quatter blocs che dattan mintgamai hockey, e betg sco 13 u 14avel attatgader.

Quels che èn surpli pon per ordinari sulet guardar la partida e vegnan mo en acziun, sche quai avess da dar blessuras, u sch'il trenader decida da midar insatge en las lingias.  

RTR actualitad 17:00

Artitgels legids il pli savens

Scrollar a sanestra Scrollar a dretga