Siglir tar il cuntegn

Header

Legenda: Quai èsi stà. Livio Roner banduna l'EHC Cuira e terminescha sia carriera RTR
cuntegn

Livio Roner Igl è stà in temp perfetg

Livio Roner, ch'aveva da mattet il siemi da daventar profi, è avanzà fin en la terza auta liga da hockey (MSL). Surtut raschuns da professiun, ma in zichel è l'interrupziun sfurzada dal campiunadi pervia da corona, han laschà prender la decisiun da chalar.

Il club da hockey da Cuira perda cun Livio Roner ina da sias pitgas. L'Engiadinais da 28 onns ha decidì da terminar sia carriera. Engiadina – Cuira – Arosa – Cuira. Quai èn stadas las staziuns da Livio Roner. Cun Arosa e Cuira ha el giugà sin il pli aut stgalim da hockey d'amaturs, la Mysports League.

«Per mai devi be il gieu cun il puck»

Sco mattet a Zernez nua che tut ha cumenzà, aveva el il siemi da daventar profi. Che la via n'è betg ida uschè lunsch na deplorescha el betg. Sche Livio Roner guarda enavos è el fitg cuntent sco tut è ì. Cun ses club da tschep da Cuira, nua ch'el è arrivà cun 15 onns e passà tras tut ils caders fin en l'emprima equipa ed era cun Arosa, nua ch'el ha giugà 3 stagiuns, è el stà ina ferma pitga, sin e sper il glatsch ed in dals capo-tiragols. Cun omaduas squadras ha el pudì festivar bels muments e success.

audio
Livio Roner e la fin da ses temp sco hockeyan
03:41 min, Actualitad dals 10.04.2021.
laschar ir. Durada: 03:41 minutas.

Era la vita senza hockey è bella

Sia decisiun da chalar ha surtut raschuns da professiun. Tar la polizia d'esters nua che Livio Roner lavura è el avanzà en ina posiziun da menar. Quella lavur na sa laschia betg pli combinar cun dar hockey sin il livel da la terza auta liga svizra. Il fatg che la stagiun da hockey è gia in temp interrutta pervia da las mesiras da corona ha anc fatg in zichel pli simpel da prender la decisiun. Al hockey resta Livio Roner fidaivel sco trenader dals uffants U9 tar il club da Cuira. El vul dar vinavant ad els quest plaschair ch'el ha adina gì sin il glatsch. Sch'el sez turna sin il glatsch na sa el betg. Sche, lura be en 2. u 3. liga u forsa era be en in'equipa che dat hockey per divertiment.

Artitgels legids il pli savens

Scrollar a sanestra Scrollar a dretga