Il sport da lutga n'ha en Engiadina betg quella tradiziun, ch'il sport ha da l’autra vart dals pass dal Güglia e dal Flüela. Tuttina datti er en il Grischun dal sid amis da quest sport da tradiziun. Or dad in'idea dad in per babs ch'èn fascinads da la lutga – è creschida durant ils davos 15 onns la pli impurtanta e populara festa da lutga dad uffants e giuvenils en Engiadina.
Entschatta a Chapella
L’idea dad organisar ina atgna festa da lutga è probabel naschida suenter in trenament da hockey, o alura suenter ina prova da pumpiers. A la maisa radunda han in per amis da la lutga decidi dad organisar ina atgna festa. Quella ha giu sia premiera l’onn 2007 a Chapella, gest sper la via chantunala. Davent da l’entschatta han era ils uffants fat part da la festa. Cun passar dals onns è la fracziun giuvna vegnida adina pli gronda. Or da la festa da lutga dals babs e naschida uschia la festa da lutga da buobs. La festa che festivescha quest onn il giubileum da 15 onns e che ha fatg il fratemp midada sin la plazza da sport Purtum a Zuoz.
Lutga cun passa 70 uffants e giuvenils
Ils giuvens lutgaders rivan da l’entira regiun, dentant er sur ils pass da Tavau, dal Partenz, da Vaz Sut, da Cuira ed era da la Muntogna. E sco mintga onn rivan alura era uffants e giuvenils dal club da lutga March-Höfe da Sviz.