Armon Orlik triumfescha a S-chanf

  • Actualisà Glindesdi, 3.7.2017, 7:50

Armon Orlik ha, sco l'onn passà, er gudagnà quest onn la festa da lutga grischuna – glarunaisa a S-chanf. En la lutga finala ha il lutgader da Maiavilla battì il Glarunais Roger Rychen suenter bun tschintg minutas.

Laschar ir video «Armon Orlik e sia victoria»

Armon Orlik e sia victoria

3:31 min, Actualitad video dals 1.7.2017

Armon Orlik, il grond favurit a la festa da lutga grischuna – glarunaisa, ha pudì defender ses titel ch'el veva gudagnà l'onn passà a Flem. Suenter in pari en l'emprima lutga n'ha Orlik laschà naginas schanzas pli a ses concurrents e mess in suenter l'auter en dies en il resgim. Per Orlik èsi stà pir la segunda festa da lutga suenter sia pausa da blessura da radund sis emnas. Orlik ha uschia demonstrà ch'el è sin buna via per il punct culminant da la stagiun, la festa d'Unspunnen la fin avust ad Interlaken.

Tut en tut han radund 2'000 aspectaturas ed aspectaturs persequità l'emprima festa da lutga grischuna – glarunaisa a S-chanf. Passa 100 gidanters e gidantras han procurà per atmosfera da festa sin l'areal dal militar a S-chanf. Tenor ils organisaturs hajan er blers aspectaturs fatg diever dals trens spezials, mess a disposiziun da la Viafier retica.

Orlik en la lutga finala

Entant che Armon Orlik è sa qualifitgà per la lutga finala ed ha uschia er gudagnà il titel dal retg da lutga en l'Engiadina è Sandro Schlegel vegnì franà. Suenter ch'el era durant l’entira lutga adina a la testa da la rangaziun ha el pers la 5avla lutga encunter Ruedi Eugster e n'ha po uschia betg cumbatter per il titel.

Tuttina dastga Sandro Schlegel esser cuntent cun sia prestaziun a S-chanf, sco era Mike Peng da Malix. El ha manchentà la lutga finala per in quart punct.

In indigen sco arbiter

1:26 min, Actualitad video dals 3.7.2017

Da l'emprim pari fin tar la quarta victoria - il triumf d'Armon Orlik

Armon Orlik, il lutgader da Maiavilla, vegn adina meglier en furma. Il defensur dal titel n'ha er laschà nagina schanza a Roman Schnurrenberger dal chantun Turitg. Suenter quatter lutgas ha Orlik gia trais victorias ed in pari sin ses fegl da notas.

Bain va la lutga a S-chanf er a Sandro Schlegel da Fideris. Era el ha suenter quatter lutgas in pari e trais victorias sin ses fegl da notas. Sper Orlik e Schlegel han fin ussa er persvadì Ursin Battaglia, Sandro Sprecher e Mike Peng.

Orlik – l'express cumenza a rudlar

Armon Orlik ha er gudagnà la terza lutga. Orlik ha fatg curt process cun Lars Geisser e mess en dies ses concurrent suenter be paucas secundas.

Entant che Armon Orlik vegn adina pli ferm è il victur da las emprimas duas lutgas Sandro Schlegel da Fideris vegni franà in zic. En la terza lutga ha el stuì sa cuntentar in pari encunter Marco Nägeli.

Emprima victoria per Orlik en la segunda lutga

En la segunda lutga ha Armon Orlik da Maiavilla festivà sia emprima victoria a S-chanf. Il defensur dal titel ha bess en il resgim Pius Näf,

In ulteriur success ha er Sandro Schlegel pudì festivar. Il lutgader da Fideris ha gudagnà sia segunda lutga da S-chanf, questa giada encunter Hansheinrich Dändliker. Suenter duas lutgas è Schlegel uschia ensemen cun Thomas Riedi a la testa da la tabella cun il maximum dals puncts. Sper Orlik e Schlegel han era Ursin Battaglia, Mike Peng e Roman Hocholdinger triumfà en la segunda lutga.

Orlik ha cumenzà cun in pari

Il defensur dal titel Armon Orlik ha stuì sa cuntentar cun in pari en l’emprima lutga encunter Fabian Kindlimann dal chantun Turitg. I n'ha pia dà nagin victur suenter la lutga da sis minutas.

Cun in success ha dentant Sandro Schlegel cumenzà la lutga da chasa. Schlegel ch'ha cuntanschì l'onn passà la lutga finala a la festa Grischuna – Glarunaisa a Flem ha battì Peter Horner da Glaruna. Ina sconfitta en l’emprima lutga hai dà per Ursin Battaglia encunter Hannes Bühler, sco era per Roman Hochholdinger encunter Lars Geisser e per Mike Peng encunter Marco Nägeli.