Per sa qualifitgar per la festa da lutga federala a Zug restan als lutgaders grischuns anc la festa da la Svizra Centrala a Flüelen e la festa dal chantun Appenzell a Stein. Lura sto il trenader dals lutgaders grischuns, Reto Attenhofer, dar part ils nums dals lutgaders grischuns che van a Zug en il resgim.
Orlik è cler – ma tgi èn ils auters?
Il leader da l’equipa grischuna, Armon Orlik, è sa qualifitgà da la bell’entschatta. Orlik è vegnì avant trais onns ad Estavayer en la lutga finala, ed è er actualmain puspè en ina furma stupenta. Cun tschintg victorias en la stagiun actuala tutga el segir tar ils favurits da la festa federala a Zug.
Sper Orlik cumbatta ina ulteriura deschina lutgaders grischuns per il bigliet a la festa federala:
Gia uss para dad esser cler che Mauro Gartmann da Präz, Sandro Schlegel da Fideris, Roman Hochholdinger da Favugn, Christian Biäsch da Tavau e Mike Peng da Malix vegnan ad esser da la partida.
Schanzas han er ils frars Jörger
Sper ils lutgaders menziunads cumbattan er ils frars Marc e Corsin Jörger per la participaziun a la festa federala. Omadus lutgaders han gudagnà in cranz tar la festa da lutga Grischuna Glarunaisa a Cazas ed èn candidats per la festa federala.
Forsa perfin in lutgader fitg giuven
Sco mintga giada emprovan ils trenaders dals lutgaders grischuns er da dar ina schanza ad in lutgader fitg giuven. Armon Orlik aveva l’onn 2013 tar la festa federala a Burgdorf mo 18 onns. Forsa po puspè in lutgader fitg giuven far sias experientschas tar ina festa federala.
RR actualitad 17:50