Siglir tar il cuntegn

Header

Navigaziun

Armon Orlik ad Estavayer
Legenda: Armon Orlik ad Estavayer RTR, Roman Dobler
cuntegn

Festa federala da lutga Set lutgaders grischuns van a Zug

Armon Orlik è il leader da l’equipa grischuna che va a Zug. Sper el van anc sis ulteriurs lutgaders a la festa federala.

Tge fin d’emna che quai è stà. Exact avant trais onns s'ha il grischun Armon Orlik lutgà en ils cors dals fans da lutga svizzers. Il giuven lutgader da Maiavilla ha persvadì e fatg furora ad Estavayer cun ses stil da lutga agressiv ed al medem mument era ordvart attractiv. Il pli tard suenter che Orlik aveva gudagnà encunter il retg da lutga Kilian Wenger eri cler: quest lutgader è in che merita il titel «retg da lutga».

La fin finala è Armon Orlik vegnì fin en la lutga finala. Era là ha el persvadì cun ses stil da lutga attractiv. In conter dal retg Matthias Glarner ha dentant terminà il siemi dad Orlik da vegnir retg da lutga. Quest onn spetga dentant la revantscha ed Orlik vul sa chapescha mussar la medema prestaziun sco gia avant trais onns ad Estavayer.

Orlik ed anc sis

Sper il leader Armon Orlik fan ulteriurs sis lutgaders grischuns il viadi tar la festa federala a Zug. Lutgaders sco Mike Peng da Malix cun ina gronda experientscha, dentant era da quels ch'èn per l’emprima giada da la partida tar ina festa da lutga federala sco Mauro Gartmann da Flearda, u alura Marc Jörger da Domat. L’equipa grischuna sa cumpona d'ina buna maschaida. Quai è impurtant, di il manader tecnic dals lutgaders grischuns, Reto Attenhofer. Orlik è noss leader, ils auters han merità la nominaziun per la festa da lutga federala atras lur prestaziuns durant l’entira stagiun.

RR sportissimo 17:00