Siglir tar il cuntegn

Lutga Ils megliers giuvens lutgaders a Landquart

Mintga trais onns ha lieu la Festa federala dals giuvens lutgaders – quest onn a Landquart. Ils megliers 150 lutgaders giuvens cumbattan lura per il titel dal retg da lutga.

Il victur da l'annada 2001 ha num Adrian Walther e vegn da Habstetten. Il Bernais ha gudagnà la runda finala cunter Lars Voggensberger. Romain Collaud da Vallon ha dumagnà en la runda finala Roman Wandeler ed è uschia l'emprim da l'annada 2002. Il victur da l'annada 2003 è Yanik Bucher da Rothrist. El ha gudagnà tut las sis rundas ed èn la finala dumagnà Lukas Zbinden.

Ils sulets Grischuns a la partenza èn stads Andreas Bärtsch da Furna e Andreas Wagner da Vaz-sut, omadus da l'annada 2002. Cun plazza 14 e 19 han els terminà la festa senza distincziun.

Rangaziun suenter trais lutgas

Tar l’annada 2001 han dominà suenter trais lutgas ils giuvens lutgaders Bernais. Sandro Galli ha manà avant Kevin Steudler e Lukas Leuenberger. Tar l’annada 2002 èn ils lutgaders da la Svizra Centrala stads a la testa. Davantvart dal tut era Roman Wendeler avant Reto Kaufmann. Ils indigens Andreas Bärtsch da Furna ed Andreas Wagner da Vaz Sut n'han anc gudagnà nagina lutga. Tar l’annada 2003 èn Yannick Bucher e Daniel Rüegg stads a la testa da la rangaziun intermediara.

Festa da lutga sumbrivà da mortori

Il di da lutga è stà sumbrivà d'in mortori. In aspectatur da 70 onns ha gì in'attatga dal cor sin la tribuna d'aspectaturs durant la pausa da mezdi. Schebain che sanitaris ed il medi da l'occurenza eran subit al lieu, n'han els betg pudì reanimar l'um.

Mintga trais onns è la festa federala dals giuvens lutgaders

Era ils giuvens lutgaders han la pussaivladad dad eruir tranter dad els il retg da lutga. Mintga trais onns s’inscuntran ils megliers tschuncanta lutgaders da mintga annada per curunar il retg da lutga. A Landquart èn sa radunads ils megliers lutgaders da las annadas 2001, 2002 e 2003. Giuvenots da 15, 16 e 17 onns han cumbattì per il titel.

Kilian Wenger e Samuel Giger èn gia stads campiuns

La festa da lutga federala per ils giuvens lutgaders datti dapi il 2006. Lura aveva il futur retg da lutga Kilian Wenger gudagnà il titel da sia annada. Sper Wenger han per exempel era Joel Wicki u Samuel Giger gia gudagnà tar ils giuvens lutgaders.

RR Sportissimo 12:00