Siglir tar il cuntegn

Header

Chautschas da lutga na vegnan betg duvradas
Legenda: Chautschas da lutga na vegnan betg duvradas RTR, Roman Dobler
cuntegn

Lutga Stefan Fausch è il nov manader tecnic dals lutgaders grischuns

Sin l’entschatta da l'onn nov ha Stefan Fausch surpiglià il post dal manader tecnic dals lutgaders grischuns da Reto Attenhofer.

Dapi quest onn è Stefan Fausch il nov manader tecnic dals lutgaders grischuns. L’anteriur lutgader da classa da Seewis ha surpiglià questa carica da Reto Attenhofer che era fin la fin da l’onn passà en quest uffizi. Gia a l’entschatta da ses engaschament sco manader tecnic dals lutgaders grischuns aveva Attenhofer annunzià da chalar suenter sis onns. Uss èn quels sis onns passads e Fausch, che era fin da qua schef da material, ha surpiglià.

Successiun perfetga

Stefan Fausch n'era betg mo il schef da material dals lutgaders grischuns, el era er trenader dals lutgaders grischuns. Ensemen cun Attenhofer ha Fausch furmà l’equipa actuala enturn il «leader» Armon Orlik. Er Stefan Fausch enconuscha fitg bain sia equipa e sa exact tge ch'i vul per far il proxim pass.

Il mument stat tut airi

Ils lutgaders grischuns han gì ina buna preparaziun sin la nova stagiun. Quella avess cumenzà l’entschatta d’avrigl cun las emprimas lutgas en il liber. Il coronavirus ha dentant era sfurzà l’entira scena da lutga da far la pausa, da chalar cun tut las activitads da trenament. Sco dapertut n'èsi il mument betg segir cura e sche insumma la stagiun po cumenzar. Durant questa stagiun da lutga na spetga nagina festa federala. Perquai fiss la fin dad avust la festa da giubileum 125 onns ESV ad Appenzell. Tar quella festa èn lutgaders da tut las tschintg federaziuns da lutga svizras da la partida. La festa da giubileum ha uschia il caracter dad ina festa federala.

RTR Sportissimo 17:06