Siglir tar il cuntegn
Inhalt

Lutga Victoria da giubileum dad Armon Orlik

Armon Orlik ha gudagnà la festa da lutga glarunaisa-grischuna a Schwanden. Igl è la dieschavla giada ch’il Grischun gudogna ina festa da tschupè.

Armon Orlik en il cumbat.
Legenda: Victoria da giubileum dad Armon Orlik. Keystone

En la lutga finala ha Armon Orlik fatg curtas cun ses adversari cunfavurit Domenic Schneider. Gia suenter 81 secundas ha Orlik smatgà Schneider en il resgim. A Schwanden en il chantun Glaruna ha Orlik confermà, ch’el s’audia tranter ils pli ferms lutgaders actuals. En la vegliadetgna da gnanc 23 onns ha il lutgader da Maiavilla gia gudagnà per la dieschavla giada en sia giuvna carriera ina festa da lutga da tschupè. En questa stagiun èsi l’emprima da questas festas impurtantas che Orlik ha gudagnà.

Ina festa quasi senza macla

Sin via en la lutga finala è Armon Orlik stà quasi senza macla. Mo encunter Samir Leuppi ha el stuì sa cuntentar cun in pari. Las ulteriuras lutgas inclusiv la lutga finala cunter Dominic Schneider ha Orlik gudagnà. Dals ferms lutgaders da la Svizra dal nordost ha sulettamain Samuel Giger mancà, il lutgader da la Turgovia ch’ha gia gudagnà quest onn duas festas.