Blers onns era la Societad da lutga engiadinaisa a la tschertga dad in local da lutga per ils mais d’enviern. A Crusch gist sper la via chantunala avev’ins lura chattà quest local. En ina veglia stalla da bescha han ils giuvens lutgaders drizzà en in local da trenament. Quel local era dentant fitg vegl e simpel, perquai eran ins vinavant a la tschertga dad in local pli adattà. La stad treneschan ils giuvens lutgaders sin la plazza or il liber a l’ur dal campadi a Sur En. Uschia mancava l’alternativa per ils mais d’enviern.
Local en ina garascha en la zona d’industria a Ramosch
Igl è necessari da trenar il sport da lutga er durant ils mais d’enviern. Perquai ha ins tschertgà in local er suenter ch'ins aveva l’alternativa simpla a Crusch. Cun la fabrica da la nova halla cun biros e garaschas en la zona industriala da Ramosch hai sa dà che la Societad da lutga ha pudì prender a fit in local en questa nova halla. Sut il tetg da la nova halla ha la Societad da lutga uss chattà ses dachasa per ils mais d’enviern. In pulit local da trenament, cun bler resgim, cun ina buna glisch, cun indrizs sanitars e perfin cun ina maisa radunda per osps u geniturs che vegnan a mirar ils trenaments da lur uffants.
Circa ina dunsaina uffants e giuvenils da la regiun treneschan lutga
Dapi passa diesch onns da quai la Societad da lutga engiadinaisa. La societad è la pli giuvna da tut las societads da lutgas grischunas. Svelt han blers uffants e giuvenils fatg part a la Societad ch’è vegnida adina pli gronda. Quai che mancava era dentant in pulit local da trenament per ils giuvens da l’Engiadina Bassa. Cun las localitads a Ramosch han ils proxims lutgaders da classa uss er en l’Engiadina Bassa l’infrastructura che i vul per vegnir forsa ina giada uschè ferm sco ils frars Armon e Curdin Orlik.