Il currider svizzer Tadesse Abraham (39) ha gudagnà il maraton a Turitg cun in nov record svizzer. El ha dumagnà ses agen temp da record dal mars 2016 (a Seoul) per duas secundas, ed è currì ils 42,195 kilometers en 2:06:38 uras. Cun quest top-resultat addemplescha Abraham era las premissas per il campiunadi europeic, l'avust a Minca.
Abraham ch'è uschia era campiun svizzer ha mussà sias fermezzas – tant tacticas sco fisicas: La segunda mesadad dal maraton è'l stà radund 1 minuta pli spert ed ha gì avunda energia per accellerar ils ultims 2 kilometers ed uschia meglierar record naziunal. Gudagnà ha'l cler avant Oliver Irabaruta (2:07:13) dal Burundi ed il Kenian Francis Cheruiyot (2:09:57).
Mathys daventa campiunessa svizra sin plaz 2
Tar las dunnas ha Maude Mathys (2:33:35) dal Vad stuì ceder mo a Hawas Demitu da l'Etiopia (2:33:08). Sco emprima Svizra recaltga Maude Mathys però il titel da campiunessa svizra che vegn era surdà al maraton da Turitg.