Las participantas ed ils participants survegnan cun lur numer da partenza er in code ch'inditgescha nua e cura ch’els han da partir la dumengia dal maraton. A maun da quest’infurmaziun possian ils sportists arrivar a pli curta vista si Malögia, uschia il directur dal Maraton da skis engiadinais, Menduri Kasper.
Nus avain studegià las ultimas emnas vid ina varianta a la partenza, per pudair garantir dapli segirezza per las passlunghistas ed ils passlunghists.
Il nov proceder da partenza saja ina consequenza indirecta da la pandemia. Cun partir en pli pitschnas gruppas hajan ils sportists er dapli plazza sin l’areal da partenza, ed il chatschim per ir en la boxa da partenza po vegnir evità. En congual cun avant hajan las passlunghistas ed ils passlunghists quatter giadas dapli spazi.
Partenza en undas
Ils maximalmain 14’200 participants vegnian scumpartids en 29 differentas undas, à 300 fin maximalmain 500 persunas. Grazia a questas partenzas etappadas spereschan ils organisaturs er, ch’i na dettia memia cumulaziuns tras il transport cun il traffic public da San Murezzan a Malögia en bus. Il maraton ha lieu ils 13 da mars.
