Suenter la matura ha il giuven hockeyan engiadinais Marc Camichel fatg midada en il Tessin. L’emprima stagiun ha el anc dà tar l’elita dal HC Lugano. Alura è el vegnì tramess a Biasca tar l’equipa partenaria dals Ticino Rockets en la Swiss League. Da là ha el midà a Pruntrut tar il HC Ajoie. El aveva in contract per la stagiun vargada, cun l’opziun da pudair prolungar quel anc per ina stagiun. Cun Ajoie è Camichel vegnì campiun en la Swiss League. Il medem mument ha Ajoie pudì turnar suenter varga trenta onns en la liga pli auta dal hockey svizzer, en la National League. Ajoie fa quest pass dentant senza Marc Camichel. L’equipa n'ha betg fatg diever da l’opziun e Camichel stat uss qua senza contract.
Focus sin la professiun?
Marc Camichel di dals trais onns ch'el ha dà en la Swiss League, che quels n'eran betg be bels. El ha vis er l’autra vart dal sport da professiun. Il squitsch da stuair mussar mintga di prestaziun, la concurrenza cun ils cungiugaders per ina plazza en il cader, u ils viadis la notg suenter las partidas encunter las equipas dal Vallais cun il return a chasa la damaun baud. Pervia da tut quels motivs as fa Camichel uss la dumonda: vi jau quai er en futur? Sun jau pront da far quai era en futur? U vuless jau cumenzar cun mia carriera professiunala?
Anc betg decidi
Da principi n'excluda Marc Camichel betg la pussaivladad da cuntinuar cun il hockey da professiun. Per pudair far dentant quai avess ina equipa da mussar interess, ed alura pudess el ponderar l’opziun. Oramai ch'el n'ha nagin contract pli èsi bain pussaivel ch'il hockeyan mida en la vita professiunala. Sur ils mais da la stad sa el gia uss lavurar en il secretariat e l’administraziun dal Engadine Golf Club en Engiadin'Ota. Forza è quai l’emprim pass en ina vita senza il hockey da professiun.