La cursa rapida ed il Super-G da las dunnas che fissan stadas la fin d'emna proxima a Garmisch-Partenkirchen en Germania èn annulladas. La raschun sajan las temperaturas autas che fetschian grev da preparar la pista, ha communitgà la Federaziun internaziunala da skis, FIS.
A curta vista n'hajan ins betg chattà in auter lieu per far las duas cursas da las dunnas. Sco proxim spetgan sin las spezialistas da speed las cursas da la cuppa mundiala a Crans-Montana en Frantscha. Las cursas han lieu davent dals 16 da favrer.
La fin d'emna proxima datti pia be ina cursa da la cuppa mundiala, numnadamain il slalom dals umens, dumengia a Chamonix en Frantscha. A Chamonix eran atgnamain era planisadas duas cursas da speed. Questas crodan però ora. Era a Chamonix èsi memia chaud e perquai betg pussaivel da preparar endretg la pista.
