Per avair ina schanza da sa participar ina segunda giada als WTA Finals, avess Belinda Bencic stuì cuntanscher almain il mezfinal en il Mexico. Enstagl han l'Americana Coco Gauff e la Franzosa, Caroline Garcia lur plazza sin segira, quai dasper Iga Swiatek, Ons Jabeur e Jessica Pegula.
Gudagnà l'emprima runda
Belinda Bencic era sa qualifitgada per la segunda runda dal turnier da WTA-1000 a Guadalajara en il Mexico. La campiunessa olimpica aveva battì la Canadaisa Leylah Fernandez en trais sets cun 7 :5, 6:7 e 6:3. En il segund set n’ha la Svizra betg pudì nizzegiar tschintg ballas da matsch. Tuttina n’ha ella betg laschà irritar ed ha gudagnà la partida suenter bunamain trais uras.
Cun nov coach
Bencic ha preschentà a Mexico ses nov coach Dimitri Tursunow. Il Russ aveva terminà sia lavur cun Emma Raducanu, la victura da l’US Open da l’onn passà, pir avant paucs dis.
Tursunow n’è pervi da sia naziunalitad betg dal tut senza ristga. L'anteriur profi da 39 onns na po betg viagiar a chasa senza restricziuns, quai pervia da la guerra en l’Ucraina. Per Russ saja parzialmain difficil u nunpussaivel da survegnir in visum d'entrada. Dimitri Tursunow na vivia dentant gia intgins onns betg pli en sia patria Moscau.
