Encunter Ambri n’è Tavau betg stà tschintg gols menders. Ma, ils Tessinais èn stads la megliera equipa ed han era nezzegià las schanzas.
Ina gronda differenza èn ils uschenumà «Special Teams» stads. Pia il powerplay e boxplay. Ambri-Piotta ha sajettà in gol cun in giugader dapli ed in gol cun in giugader pli pauc. Tavau perencunter ha pudì dar set giadas cun in giugader dapli, dentant senza dumagnar il puck en la rait d’Ambri. Da menziunar è ch’il goli finlandais d’Ambri, Janne Juvonen ha mussà pliras paradas miraculusas.
Per il HCD va la Cuppa Spengler a fin cun duas victorias e duas terradas. Sco en il campiunadi ha la constanza er mancà a la Cuppa Spengler. L'entir turnier è stà in si e giu. La megliera prestaziun è stada la victoria da 2:1 encunter il Team Canada ed il punct il pli bass è stà il debachel da 2:9 encunter Sparta Prag.
Spitachel tranter Sparta Prag ed Örebro
L'emprim mezfinal da la Cuppa Spengler 2022 è stà grond divertiment per ils 6'267 aspectaturs en il stadion plain. Fin la 30avla minuta èn ils Svedais d'Örebro ì en avantatg cun 3:0, ma suenter 40 minutas stevi gia 4:3 per Sparta Prag. Spezialmain il segund terz è stà fitg salvadi cun occasiuns sin omaduas varts ed en tut sis gols.
Sparta Prag ha uschia era gudagnà il terz gieu da la Cuppa Spengler. En la fasa da gruppa han els gia battì il Team Canada e declassà il HCD.