Enrico Maassen daventa nov trenader dal club da ballape da Son Gagl. Il Tudestg haja suttascrit in contract fin la stad 2027, scriva l'FC Son Gagl sin sia pagina d'internet. Dal 2022 fin il 2023 aveva Maassen trenà il club da ballape da Augsburg. El succeda a Peter Zeidler, che mida tar Bochum en la Bundesliga tudestga.
Il trenader dal club da ballape da Son Gagl, Peter Zeidler ha bandunà il club svizzer suenter esser stà en uffizi sis onns. Sco quai ch'il FC Son Gagl ha confermà, bandunia Zeidler il club sin agen giavisch. El midia en Germania, tar il club da la Bundesliga, il VfL Bochum. Il Tudestg da 61 onns ha suttascrit tar Bochum in contract da dus onns.
Sut Zeidler è il club da la Svizra Orientala sa qualifitgà duas giadas per il final da la cuppa svizra. L'onn 2021 ha Son Gagl giugà en il final cunter Lucerna ed il 2022 cunter Lugano. Tuttas duas partidas ha Son Gagl entant pers. La stagiun passada da la Super League ha il FC Son Gagl finì sin plazza tschintg da la tabella. Quai cun 16 victorias, nov paris e 13 terradas.