Tom Lüthi parta la dumengia sco 26avel en il Grond Premi da la Spagna a Jerez. I sa tracta dal mender plaz da partenza dal Benais da 34 onns en questa stagiun. Il pli spert è stà il Spagnol Jorge Martín.
Gia il venderdi aveva Lüthi gì in grond retard ed era cupitgà. Envers SRF aveva el gia lura ditg ch'el na sappia strusch pli tge dir. Suenter la stagiun vargada senza in plaz da podest aveva sperà dad anc ina giada dar schlantsch a sia carriera cun la midada da team tar l'equipa spagnola SAG. Fin uss n'èn ils resultats però betg vegnids megliers, anzi anc menders. Questa dumengia pudessi dar la terza da quatter cursas senza puncts cun questa plazza da partenza. Or da la pole-position parta l'Australian Remy Gardner che mania er il classament general da la Moto 2
En la Moto GP va la pole-position al Franzos Fabio Quartararo che maina là il classament general.