Siglir tar il cuntegn

Header

Nino Schurter
Legenda: Nino Schurter ha battì piz a cup ses cumpatriot Mathias Flückiger al campiunadi mundial il 2021 a Val di Sole en l'Italia. Keystone
cuntegn

Mountainbike – cuppa mundiala Vital Albin: «Jau profitesch fitg da Schurter e Flückiger»

Il mountainbiker da Tersnaus vul far in ulteriur pass enavant e vegnir pli datiers da l’elita mundiala. Las premissas na pudessan betg esser meglras.

Vital Albin fa part ad ina da las meglras equipas da mountainbike dal mund, ha cun Mathias Flückiger il numer 1 dal mund sco collega d’equipa e po uschia er profitar da buns sponsurs e top material. Plinavant dastga il Lumnezian da 23 onns era adina puspè trenar cun Nino Schurter ch'abitescha medemamain a Cuira.

audio
Vital Albin emprova da fitgar pe en la cuppa mundiala
aus Actualitad vom 09.04.2022.
abspielen. Laufzeit 3 minutas 56 Sekunden.

Il program da la cuppa mundiala

Durant la stagiun da mountainbike stattan sin il program 9 cursas da la cuppa mundiala. Liber vai dals 8 fin ils 10 d’avrigl a Petrópolis en la Brasilia, bun 60 kilometers en il nord da Rio de Janeiro. En questa regiun avevan ils Svizzers sa preparà sin ils gieus olimpics 2016 a Rio. Igl è l’emprima cursa da la cuppa mundiala en l’America dal Sid. Il punct culminant spetga la fin avust a Les Gets en Frantscha. Là vegn cumbattì per medaglias al campiunadi mundial da mountainbike.

  • 08 – 10 d’avrigl: Petrópolis, Brasilia
  • 06 – 08 da matg: Albstadt, Germania
  • 13 – 15 da matg: Nové Mesto, Tschechia
  • 10 – 12 da zercladur: Leogang, Austria
  • 08 – 10 da fanadur: Lai, Svizra
  • 15 – 17 da fanadur: Vallnord, Andorra
  • 29 – 31 da fanadur: Snowshoe, Stadis Unids
  • 19 – 20 d’avust: European Championships a Minca, Germania
  • 24 – 28 d’avust: Campiunadi mundial da MTB a Les Gets, Frantscha
  • 02 – 04 da settember: Val di Sole, Italia
video
Nino Schurter: «Jau sper ch'jau cuntanschi quest onn il record»
Or da Sport-Clip dals 07.04.2022.
abspielen. Laufzeit 25 Sekunden.

Il record

Nino Schurter ch’è daventà l’onn passà a Val di Sole per la 9avla giada campiun mundial ha en questa stagiun la finamira da gudagnar sia 33avla cursa da la cuppa mundiala ed uschia egualisar il record da la legenda franzosa e dubel campiun olimpic, Julien Absalon. Schurter emprova dapi il 2019 d’egualisar quest record. Enfin uss ha il campiun olimpic da Rio gudagnà 32 cursas da la cuppa mundiala en sia carriera.

video
Nino Schurter: «Jau hai fatg bleras dumondas a mamez ils davos 2 onns»
Or da Sport-Clip dals 07.04.2022.
abspielen. Laufzeit 52 Sekunden.

Il favurit

Il 2021 è stà l’onn da Mathias Flückiger. Il Bernais da 33 onns ha gudagnà il classament general da la cuppa mundiala. Plinavant è Flückiger daventà vice-campiun olimpic a Tokio. Argient hai er dà per el al campiunadi mundial a Val di Sole, davos Nino Schurter. Mathias Flückiger è l’actual numer 1 dal mund ed uschia il favurit en questa stagiun da mountainbike 2022.

video
Jolanda Neff davart sia furma ed il plaschair sin la nova stagiun
Or da Sport-Clip dals 07.04.2022.
abspielen. Laufzeit 1 minuta 22 Sekunden.

Il trio

Jolanda Neff, Sina Frei e Linda Indergand han scrit istorgia als davos gieus olimpics da stad a Tokio. Neff è daventada campiunessa olimpica avant sias cumpatriotas Frei ed Indergand. Quest trio vul uss er persvader en la cuppa mundiala ed uschia er mussà ch’il triumf a Tokio n’è betg stà ina casualitad.

video
Jolanda Neff: «Il temp suenter ils gieus olimpics n'è betg pli stà leghers»
Or da Sport-Clip dals 07.04.2022.
abspielen. Laufzeit 3 minutas 37 Sekunden.

Quai è nov

Midadas datti en questa stagiun pertutgant las cursas da short track che vegnan mintgamai realisadas dus dis avant la cursa roiala da cross-country. Da nov datti ina rangaziun, in classament general per questas cursas da sprint ch’èn vegnidas lantschadas avant quatter onns. Plinavant datti per ina victoria en ina cursa da cross-country sulet 80 puncts, betg pli sco fin qua 125 puncts.

RTR actualitad 07:00

Artitgels legids il pli savens

Scrollar a sanestra Scrollar a dretga