Vital Albin è stà ditg sin ils chaltgogns a la gruppa da testa. Pir encunter la fin ha el pers il contact cun ils megliers ed uschia manchentà in plaz sut ils top 10, quai ch’era sia finamira. Als davos campiunadis mundials avant in onn a Les Gets en Frantscha er’il Lumnezian vegnì 14avel en il short-track. Schanza da far meglier survegn Vital Albin la sonda en la cursa principala da cross-country.
Gudagnà la cursa ha Samuel Gaze. Il mountainbiker da la Nova Zelanda ha uschia pudì defender il titel en questa disciplina. Gaze ha battì en il sprint final il Franzos Victor Koretzky. Gudagnà bronz ha il Brit Tom Pidcock.
Svizras dasper las medaglias
Er las mountainbikeras svizras n’han betg dal tut pudì persvader en la cursa da short-track, quai cun excepziun da Steffi Häberlin. La studenta da medischina ha mussà ina da sias meglras cursas insumma e la finala cuntanschì il 7avel plaz, in plaz davos Alessandra Keller ch’è sco 6avla stada la meglra svizra.
Jolanda Neff ha stuì sa cuntentar cun il 9avel plaz e Sina Frei, la campiunessa mundiala dal 2021, è cupitgada ed ha stuì dar si la cursa suenter la 5avla runda. Cun Ramona Forchini sco 17avla è anc in'ulteriura svizra classada sut las top 20.
Pauline Ferrand Prevot betg da franar
Sco gia avant in onn avant ils fans da chasa ha Pauline Ferrand Prevot er triumfà a Glasgow. La Franzosa ha la finala distanzià Puck Pieterse da l’Ollanda per 4 secundas. La matadura locala Evie Richards è vegnida terza ed ha uschia gudagnà bronz.
