Siglir tar il cuntegn

Header

video
Nino Schurter gudogna a moda dramatica sia 33avla cursa da la cuppa mundiala.
Or da Sport-Clip dals 10.04.2022.
abspielen. Laufzeit 1 minuta 34 Sekunden.
cuntegn

Mountainbike Triumf istoric per Nino Schurter

Nino Schurter ha cuntanschì sia davosa gronda finamira da la carriera. Il mountainbiker oriund da Tersnaus ha gudagnà l’emprima cursa da la cuppa mundiala en questa stagiun a Petrópolis en la Brasilia, festivà sia 33avla victoria en la cuppa mundiala ed uschia egualisà il record da Julien Absalon.

video
Nino Schurter egualisescha il record da Julien Absalon
Or da Sport-Clip dals 10.04.2022.
abspielen. Laufzeit 2 minutas 11 Sekunden.
  • Il mountainbiker Nino Schurter gudogna a Petrópolis en la Brasilia sia 33avla cursa da la cuppa mundiala en la disciplina cross country. La decisiun è crudada sin la lingia da l’arrivada.
  • Grazia a questa victoria egualisescha Nino Schurter il record dal Franzos Julien Absalon da 33 victorias en la cuppa mundiala.
  • Tar las dunnas han las Svizra manchentà in plaz da podest. Jolanda Neff ha stuì desister sin la cursas pervia d’ina malsogna.

Nino Schurter ha triumfà piz a cup avant il Franzos Maxime Marotte ed il Rumen Vlad Dascalu. La decisiun è crudada pir sin ils davos meters en in sprint final. La davosa giada che Schurter aveva triumfà en la cuppa mundiala era stà la stad 2019. Dapi lura er il mountainbiker da 35 onns a la chatscha da quest record.

Il davos siemi da la carriera

Cun triumfar per la 33avla giada ad ina cursa da la cuppa mundiala ha Nino Schurter cuntanschì sia davosa gronda finamira da la carriera. Tge muntada che questa victoria ha per il 9-dubel campiun mundial ha mussà sia reacziun en l’arrivada. Schurter ha sa legrà uschè fitg sco forsa anc mai bragì durant pliras minutas ord spir plaschair e levgiament.

video
Schurter: «Talas cursas restan per adina en memoria»
Or da Sport-Clip dals 10.04.2022.
abspielen. Laufzeit 1 minuta 12 Sekunden.

Nino Schurter ha mussà ina cursa fitg activa davent dal cumenzament. El ha adina puspè attatgà ed empruvà da scappar da la concurrenza. La finala han sulet Maxime Marotte e Vlad Dascalu pudì tegnair pitg cun il Grischun. Quest trio ha cumbattì fin ils davos meters per la victoria. Tar la davosa descensiun ha Marotte pudì surpassà Schurter ed uschia pudì lantschar il sprint final ord la meglra posiziun. Ma Schurter ha anc ina gia pudì reagir e pudì surpassar il Franzos sin ils davos meters.

Trumpada per Mathias Flückiger e Vital Albin

Ina buna prestaziun ha er Filippo Colombo mussà. Il Tessinais è vegnì 5avel. Cun Thomas Litscher sco 10avel ha anc in terz svizzer cuntanschì in plaz sut ils top 10. Mathias Flückiger, ch’ha gudagnà la stagiun passada il classament general da la cuppa mundial e ch’è actualmain il numer 1 dal mund, ha percunter stuì sa cuntentar cun il 14avel plaz cun in retard da bunamain trais minutas. Vital Albin da Tersnaus è vegnì 40avel cun in retard da 6:39 minutas sin Nino Schurter.

audio
Per tadlar: Curt e cumpact
aus RTR Audio vom 11.04.2022.
abspielen. Laufzeit 1 minuta 20 Sekunden.

Nagin exploit tar las dunnas svizras

Tar las dunnas ha Rebecca McConnell festivà sia emprima victoria en la cuppa mundiala. L’Australiana ha triumfà avant l’Ollandaisa Anne Terpstra e la Franzosa Loana Lecomte. Meglra svizra è vegnida Linda Indergand sco 7avla. Alessandra Keller è vegnida 8avla e Sina Frei 17avla. Betg stada a la partenza è Jolanda Neff ch’ha piglià dafraid.

La proxima cursa da la cuppa mundiala è dals 6 fin ils 8 da matg ad Albstadt en Germania. Dals 8 fin ils 10 da fanadur stattan sin il program las cursas da la cuppa mundiala a Lai.

Novitads 22.00

Artitgels legids il pli savens

Scrollar a sanestra Scrollar a dretga